Qytaılyq ınvestorlar Túrkistanda shulyq shyǵaratyn boldy
TÚRKІSTAN. KAZINFORM - Túrkistan oblysynda bir kúnde 2 kásiporyn ashylyp, 1 zaýyttyń kapsýlasy salyndy.
Búgin «TURKISTAN» ındýstrıaldy aımaǵynda Qazaqstan men Qytaı ınvestorlarynyń birlesken jobasymen shulyq jáne shulyq buıymdaryn shyǵaratyn kásiporyn iske qosyldy. Bul jobanyń quny – 1 mlrd teńge. Kásiporyn kúnine 32 myń jup shulyq shyǵarýǵa qaýqarly. 30 jumys orny ashylǵan.
Investorlar shulyq fabrıkasy tolyq qýatyna jetken soń Túrkistanda kostıým shyǵaratyn jobany da júzege asyrmaq. Bul jobaǵa 2,8 mlrd teńge ınvestıtsııa salynady. Kúnine 500 kostıým tigiledi dep kútilip otyr.
Sondaı-aq, «TURKISTAN» ındýstrıaldy aımaǵynda jıhaz shyǵaratyn kásiporyn iske qosyldy.
Munda 50-ge jýyq jańa jumys orny quryldy. Zamanaýı, sońǵy úlgidegi tehnologııalarmen jabdyqtalǵan tseh kúnine 600 dana jıhaz shyǵarýǵa qaýqarly. Atalǵan kásiporyn oblys mektepterin, balabaqshalaryn, sonymen birge, óńirde ashylyp jatqan ǵımarattardy tolyqtaı jıhazben qamtýǵa úles qospaq.
Túrkistandaǵy «TURAN» arnaıy ekonomıkalyq aımaǵynda sendvıch-panel shyǵaratyn jańa zaýyttyń kapsýlasy salyndy.
Bul mańyzdy ári zamanaýı jobanyń ınvestıtsııalyq quny – 1,54 mlrd teńge. Jańadan 32-den astam jańa jumys orny qurylady. Munda sendvıch-panelder, gofrlengen qańyltyrlar, metall plıtkalar jáne ózge de qurylysqa qajetti zattar shyǵarylady dep josparlanǵan. Búginde zaýyt salynatyn jer bólinip, tıisti jumystar bastalyp ketken.
Saltanatty sharaǵa oblys ákimi Darhan Satybaldy men ınvestorlar arnaıy qatysyp, jurtshylyqty quttyqtady.
«Memleket basshysy Qasym-Jomart Kemelulynyń tapsyrmasyna sáıkes, oblysymyzdyń óńdeý ónerkásibin damytý úshin jáne qala turǵyndaryna jumys oryndaryn ashýǵa úlesin qosatyn jańa zaýyt qurylysy bastalǵaly tur. «Panel Sistem KZT» kompanııasy jobasynyń iske qosylýy oblystyń áleýmettik-ekonomıkalyq damýyna tyń serpin berip, otandyq ónimdermen qamtamasyz etý kólemin arttyrýǵa jáne halyqtyń ál-aýqatyn kóterýge óz septigin tıgizedi. Biz ınvestıtsııa tartý, kásiporyndar men jumys oryndaryn ashýǵa basymdyq berip otyrmyz. Jumystar jalǵasady. Bastamaǵa sáttilik jáne tabys tileımin!» – dedi Darhan Satybaldy.
Taǵy bir jańalyq, Túrkistanda pandemııa kezinde jumysyn ýaqytsha toqtatqan «Golden Camel» zaýyty óz jumysyn qaıta bastady. Óndiris orny túıe jáne bıe sútinen qurǵaq sút shyǵarýmen aınalysady. Sonymen qatar munda ulttyq sýsyn sońǵy protseske deıin óńdelip, kosmetıkalyq ónimder men turmystyq hımııalyq suıyqtyqtar shyǵarylady.
