Qytaılyq gendik terapııa týa bitken sańyraýlardyń estý qabiletin qalpyna keltirdi
ASTANA. KAZINFORM – Qytaı jáne AQSh-tyń molekýlalyq bıologtary OTOF geniniń zaqymdanýyna baılanysty týa bitken sańyraýlyqqa qarsy ázirlengen gendik terapııanyń alǵashqy aýqymdy synaqtaryn aıaqtady. Bul týraly AQSh-taǵy Massachýsets oftalmologııa jáne otolarıngologııa aýrýhanasynyń (MEE) baspasóz qyzmeti habarlady.
Terapııa eriktilerdiń 90 paıyzynda estý qabiletin qalpyna keltirip, emniń áseri 2,5 jyldan astam ýaqyt boıy saqtalǵan.
Fýdan ýnıversıtetiniń professory Shý Ilaıdyń aıtýynsha, tájirıbe terapııany qarapaıym aýrýhanalarda da engizýge bolatynyn kórsetip, ony múmkindiginshe kóp naýqasqa qoljetimdi etýge jol ashady.
– Birden birneshe klınıkanyń qatysýymen júrgizilgen klınıkalyq synaqtar OTOF genindegi mýtatsııalarmen kúresýge baǵyttalǵan biz ázirlegen gendik terapııanyń joǵary tıimdiligin rastady. Bul tájirıbeler terapııany qarapaıym aýrýhanalarda da engizýge bolatynyn kórsetti, al bul ony barynsha kóp naýqasqa qoljetimdi etedi, – dedi professor Shý Ilaı.
Ǵalymdar ázirlegen gendik terapııa adamnyń ishki qulaq jasýshalaryna ene alatyn AAV9 adenoassotsıatsııalanǵan vırýstary negizinde jasalǵan. Zertteýshiler bul vırýstardyń bólshekterin ózgertip, olardyń qulaq jasýshalaryna OTOF geniniń saý nusqasyn jetkizýin qamtamasyz etken.
Atalǵan DNQ bóligi ishki qulaqtaǵy túkti jasýshalarda dybys terbelisterin elektr ımpýlsterine aınaldyrýǵa qajet aqýyz molekýlalarynyń sıntezine jaýap beredi. Sondyqtan onyń zaqymdanýy tolyq sańyraýlyqqa ákelýi múmkin.
Birneshe jyl buryn bıologtar tyshqandarǵa jáne eriktilerdiń shaǵyn toptaryna júrgizilgen tájirıbeler arqyly bul máseleni atalǵan terapııany engizý arqyly aldyn alýǵa bolatynyn dáleldegen edi.
Jýyrda zertteýshiler osy terapııany tekserýdiń kezekti kezeńin qorytyndylady. Oǵan jasy birneshe aılyq sábıden 32 jasqa deıingi, DNQ-synda OTOF geniniń mýtatsııasy bar Qytaıdyń 42 turǵyny qatysty.
Ǵalymdar qatysýshylardyń estý múshelerine gendik terapııanyń birden úsh dozaǵa deıingi mólsherin engizip, 2,5 jyl boıy olardyń estý qabiletiniń ózgerisin baqylaǵan.
Baqylaý nátıjeleri em bastalǵannan keıin birneshe apta ishinde eriktilerdiń 90 paıyzynda estý qabileti aıtarlyqtaı jaqsarǵanyn kórsetti. Onyń ishinde tájirıbege qatysqan eresekterdiń 66 paıyzynda oń nátıje baıqalǵan.
Sonymen qatar bıologtar terapııadan ómirge qaýipti janama áserlerdi tirkemegen. Bul týa bitken sańyraýlyqty emdeýde atalǵan ádistiń bolashaǵy zor ekenin kórsetedi.
Eske sala ketsek, qytaılyq robottar Brazılııadaǵy naýqasqa qashyqtan joǵary dáldiktegi ota jasady.
Aıta keteıik, densaýlyq saqtaý mınıstrligi eldegi pedıatrııalyq qyzmetti kúsheıtip jatyr
