Qytaılyq ǵalymdar genomdyq túrlendirilgen shoshqa ókpesin adamǵa sátti kóshirdi
ASTANA. KAZINFORM -Qytaılyq ǵalymdar mıy ólgen naýqastyń denesine genomdyq túrlendirilgen shoshqanyń ókpesin sátti kóshirdi, bul jetistik ókpe transplantatsııasy boıynsha donor tapshylyǵyn azaıtýǵa múmkindik berýi yqtımal, dep habarlaıdy Lianhe Zaobao basylymy.
Zertteý toby 25 tamyz kúni Ulybrıtanııanyń «Nature Medicine» jýrnalynda maqala jarııalap, genomdyq túrlendirilgen shoshqa ókpesiniń alǵash ret adam denesine sátti qondyrylǵanyn habarlady.
Gýanchjoý medıtsına ýnıversıtetiniń janyndaǵy Birinshi klınıkalyq aýrýhananyń professory He Tszıansın jetekshilik etken ǵalymdar toby klınıkada jıi jasalatyn bir ókpeni aýystyrý otasynyń úlgisimen genetıkalyq túrlendirilgen Bama shoshqasynyń sol jaq ókpesin mıy ólgen adamnyń denesine kóshirdi.
Basylymnyń jazýynsha, zertteýshiler donor-shoshqanyń genin alty jerden ózgertken. Bul – aǵzany adam denesine qondyrǵannan keıin ımmýndyq qaýip-qaterdi azaıtý maqsatynda jasalǵan qadam. Otadan keıingi tynys alý, qan aınalymy jáne ózge de kórsetkishter qondyrylǵan ókpeniń toǵyz kún boıy qalypty qyzmet atqarǵanyn kórsetti. Osy ýaqyt ishinde asa jedel qabyldamaý reaktsııasy tirkelmedi, al parallel júrgizilgen patogendik baqylaý belsendi ınfektsııa belgilerin anyqtamady.
Ǵalymdardyń aıtýynsha, joba ulttyq zańdar men etıkalyq normalarǵa saı júrgizilgen. Ol aýrýhananyń etıkalyq keńesi jáne basqa da quzyrly mekemeler tarapynan tekserilip, baqylaýǵa alynǵan. Synaqqa qatysýshy aýyr bas-mı jaraqatynan keıin birneshe márte táýelsiz saraptama negizinde mıy ólgeni anyqtalǵan naýqas boldy. Onyń otbasy medıtsınanyń damýyna qoldaý kórsetý maqsatynda zertteýge aqysyz qatysýǵa kelisim bergen. Zertteý toǵyzynshy kúni naýqastyń jaqyndarynyń ótinishi boıynsha toqtatyldy.
Buǵan deıin Qytaıdyń «Tıangýn» orbıtalyq stantsııasynyń ekıpajyna alǵashqy JI kómekshi qosylǵany týraly jazǵan edik.