Qytaılyq ǵalymdar ǵaryshqa arnalǵan kir jýǵysh mashına jasap shyǵardy
ASTANA. KAZINFORM – Qytaıda zertteýshiler ǵaryshkerlerge arnalǵan shaǵyn kir jýǵysh mashına jasap shyǵardy. Salmaǵy 12 keli qurylǵy kıimdi bir tsıklde nebári 400 ml sý jumsap, ýltramaıda tuman men ozonnyń kómegimen tazartady, dep habarlaıdy South China Morning Post.
Chinese Journal of Space Science jýrnalynyń málimetinshe, tehnologııa «Tıangýn» orbıtalyq stantsııasy men bolashaq aı bazalaryna jetkiziletin kıim kólemin 60%-dan astam kólemde qysqartýǵa múmkindik beredi. 15 jyldyq mıssııadaǵy úsh adamnan turatyn ekıpaj úshin bul – 3,3 tonnadan astam kıim.
Osy ýaqytqa deıin ǵaryshkerlerdiń orbıtada kıimderin jýýǵa múmkindigi bolmaǵan. Olar kıimin jaǵymsyz ıis paıda bolǵansha kıip júrdi, sodan keıin ony Jer atmosferasynda órtenip ketken júk kapsýlasyna tastap keldi.
- Aı men Marsqa bolashaq uzaq merzimdi mıssııalardy eskere otyryp, borttyq kir jýý tehnologııasyn damytý Jerden keletin jetkizilim júktemesin azaıtýdyń kilti bolady, - dep atap ótti zertteý avtorlary.
Mashına kem degende bes jyl jumys isteýge arnalǵan jáne mıkrogravıtatsııanyń erekshelikterin eskeredi. Ol matalardy hımııalyq zattarsyz zararsyzdandyrady jáne ylǵal men gazdyń kemýine jol bermeıdi. Kelesi kezeń – jumys prototıpin qurý jáne qurylǵy tıimdiligin arttyrý.
Buǵan deıin qytaılyq astronavttar alǵash ret JI assıstent kómegine júgingenin jazǵan bolatynbyz.
