Qytaılyq ǵalymdar ǵalamshararalyq saıahatqa yńǵaıly kıim oılap tapty

Qytaılyq ǵalymdar qorshaǵan orta temperatýrasy qubylyp turǵanyna qaramastan adamǵa qolaıly temperatýrada bolatyn kún batareıalaryna negizdelgen kıim júıesin oılap tapty. Kazinform bul týraly  TASS-qa silteme jasap habarlaıdy. 

Science jýrnalynyń habarlaýynsha, Nınkaı ýnıversıteti zertteýshileriniń jańalyǵynyń jylýdy retteıtin basqa kıim úlgilerinen ereksheligi, ol - kún sáýlesinde qýattalǵannan keıin bir táýlik ishinde temperatýrany retteıtin qurylǵynyń arqasynda jylytýǵa da, sýytýǵa da qabiletti.

Ónertapqyshtardyń sózinshe, kún elementterine negizdelgen kıim qorshaǵan orta temperatýrasy qubylǵan kezde adam aǵzasynyń jaılylyǵy men qaýipsizdigin arttyrýǵa, tipti «ekstremal jaǵdaılarda, mysaly ashyq ǵarysh pen basqa ǵalamsharlarda aman qalý múmkindigin arttyrady».