Qytaılyq CAS Space ǵaryshtyq týrızmge arnalǵan sýborbıtaldy apparatty sátti synady

ASTANA. KAZINFORM - Qytaıdyń CAS Space kommertsııalyq aeroǵarysh kompanııasy sýborbıtaldy «Lıhýn-1 Y1» apparatynyń synaq rejımindegi ushyrylymyn sátti oryndady, dep habarlaıdy Kazinform agenttiginiń menshikti tilshisi Xinhua aqparat kózine silteme jasap.

Synaq barysynda qaıta oralatyn kapsýla parashıýt júıesiniń kómegimen Tszıýtsıýan ǵarysh aılaǵyna qalypty jaǵdaıda qondy. Ushý kezinde apparat 120 shaqyrym bıiktikke kóterilip, ınjenerler atmosferanyń tyǵyz qabattaryna kirgen sáttegi aerodınamıkalyq tejelý tehnologııasyn jáne asa dál qoný júıesin synaqtan ótkizdi.

CAS Space bul jobany kommertsııalyq sektorǵa arnalǵan shyǵyny tómen platforma retinde usynyp otyr. Ázirleýshilerdiń aıtýynsha, apparat 300 sekýndtan astam turaqty mıkrogravıtatsııa jaǵdaıyn qamtamasyz ete alady. Bul onyń áleýetin tek ǵarysh týrızmi úshin ǵana emes, ǵylymı tájirıbeler júrgizýge de paıdalanýǵa múmkindik beredi.

Synaq aıasynda bortqa Qytaı ǵylym akademııasynyń Mehanıka ınstıtýtyna tıesili jabdyqtar ornatylyp, salmaqsyzdyq jaǵdaıynda lazerlik addıtıvti óndiris tehnologııasy tekserildi. Nátıjesinde zymyran platformasynyń orbıtalyq óndiristi qoldaýda tıimdi ekeni dáleldendi.

Sonymen qatar ǵaryshqa raýshan gúliniń tuqymdary da jiberildi. Ǵalymdar alynǵan genetıkalyq mýtatsııalardy zerttep, jańa suryptar shyǵarý men «ǵarysh raýshandarynyń» uryq plazmasy qoryn qalyptastyrýdy kózdep otyr.

Kompanııanyń bas konstrýktorynyń orynbasary Van Inchenniń málimdeýinshe, aldaǵy ýaqytta «Lıhýn» serııasyn keńeıtý josparlanǵan. Qazirgi kezeńde CAS Space mamandary adam ómirin qamtamasyz etý jáne tótenshe jaǵdaıda qutqarý júıelerin jetildirýge basymdyq berip otyr.

Osyǵan deıin Qytaıdyń ortasha bıiktikke ushatyn dron-kólik shyǵarǵany týraly jazdyq.