Qytaılyq BAQ: Qazaqstan ornatqan rekordty qaıtaladyq
ASTANA. KAZINFORM – IX qysqy Azııa oıyndary keshe Qytaıdyń Harbın qalasynda máresine jetti. Qytaılyq BAQ-tar eldiń Aq Azıadada qol jetken jetistikteri jaıly sóz qozǵaǵanda, Qytaı quramasynyń 32 altyndy qanjyǵasyna bókterip, osy kórsetkish boıynsha 2011 Qazaqstan ornatqan rekordtyq mejeni baǵyndyrǵanyna erekshe ekpin berdi.
Qytaıdyń bas gazeti — «Jenmın Jıbao»-nyń («Halyq Gazeti») aqparattyq portaly dúbirli dodanyń sońǵy kúni Qytaı quramasynyń taǵy bir altyndy enshilep, jalpy altyn medal sanyn 32-ge jetkizgenin, osylaısha Qazaqstan quramasynyń qysqy Azııa oıyndaryndaǵy rekordtyq kórsetkishimen teńeskenin atap ótti.
— Aq Azıada aıaqtaldy. Qytaı quramasy jalpy 32 altyn, 27 kúmis jáne 26 qola medal jeńip alyp, qysqy Azııa oıyndary boıynsha óz tarıhyndaǵy eń úzdik nátıjege qol jetkizdi, - dep jazady basylym.
«Tsılý aqshamy» basylymy kezekti Aq Azıda jabylǵanǵa deıin bir oıynda jeńip alǵan altyn medal men jalpy medal sany boıynsha rekordtyq kórsetkish Qazaqstan quramasyna tıeseli bolyp kelgenin eske alypty.
— 2011 jyly Astana jáne Almaty qalalarynda ótken qysqy Azııa oıyndarynda Qazaqstan quramasy 32 altyn, 21 kúmis, 17 qola — jalpy 70 medal jeńip alyp, altyn medal men jalpy medal sany boıynsha jańa rekord ornatqan edi. Bul joly Harbın qalasynda Qytaı quramasy jalpy 85 medal alyp, medaldar sany boıynsha jańa rekord ornatty. Eger búgin (14 aqpan) kerlıngten Qytaı áıelder komandasy altyn medaldan qapyda aıyrylyp qalmaǵanda, Qytaı quramasy bir oıynda oljalanǵan altyn medal sany boıynsha Qazaqstan ornatqan rekordty jańartyp, jańa bıikti baǵyndyrar edi, - dep jazady «Tsılý aqshamy».
Qytaı Olımpıada komıteti tóraǵasynyń orynbasary Chjoý Tsıan «Qytaı sporty» gazetine bergen suhbatynda Harbınde ótken dodada Qytaı quramasynyń tarıhı jeńiske jetkenin atap ótti.
— Bıylǵy qysqy Azııa oıyndaryna Qytaıdan 170 sportshy qatysyp, qysqy sporttyń 6 negizgi, 11 qosalqy jáne 64 kishi túrinde baq synady. Oıyn qorytyndysy boıynsha Qytaı quramasy jalpy 85 medal jeńip alyp, altyn medal men jalpy medal sany boıynsha kósh bastady. Bul — qysqy Azııa oıyndarynyń tarıhyndaǵy Qytaıdyń eń jaqsy kórsetkishi. Aýyz toltyryp aıtarlyǵy, sportshylarymyz 2011 jyly Qazaqstan quramasynyń bir oıynda 32 altyn medal alǵan tarıhı rekordyn qaıtalap, olardyń jalpy medal sany boıynsha (70 medal) rekordyn jańartty. Osylaısha Qytaı quramasy úsh márte qysqy Azııa oıyndarynan keıin altyn jáne jalpy medal sany boıynsha qaıtadan birinshi orynǵa kóterildi, - deıdi Chjoý Tsıan.
The Paper aqparattyq portaly jarystyń sońǵy kúni Qytaı quramasynyń 32-shi altyndy jeńip alyp, 2011 jyly Qazaqstan quramasy ornatqan rekordtyq kórsetkishti qaıtalaǵanyn jazypty. Qytaıdyń Dene shynyqtyrý jáne sport jónindegi memlekettik bas basqarmasy Qysqy sport ortalyǵynyń dırektory Van Leıdiń pikirinshe, Qytaı quramasynyń kezekti qysqy Azııa oıyndarynda altyn jáne jalpy medal sany boıynsha tarıhı jetistikke qol jetkizýi «bilikti mamandar daıarlaý» jáne «sporttyń álsiz túrlerin nyǵaıtý» strategııasynyń arqasynda múmkin bolyp otyr.
— Bizdiń delegatsııa eldiń ár aımaǵynan shyqqan sportshylardan jasaqtaldy. Dástúrli soltústik aımaqtarmen ǵana shektelmeı, ózge de 20 provıntsııa men megapolısten sportshylar daıyndadyq. Olardyń qatarynda 9 etnıkalyq azshylyqtyń 26 ókili de bar. Bul rette Qytaı quramasyndaǵy sportshylardyń ortasha jasy 23-te. Olardyń qatarynda qıyndyqqa muqalmaıtyn tájirıbeli sportshylar da, jarqyrap kózge túsip kele jatqan jańa juldyzdar da bar. Shynymen de naǵyz úzdikterdi saralap, bar kúshimizdi saldyq desek, artyq aıtqan bolmaımyz, - deıdi ol.