Qytaılyq Azıada chempıony: Ásel óte úzdik sportshy, oǵan sáttilik tileımin
NAGOıA. KAZINFORM — Karateden Japonııada ótip jatqan Azııa oıyndarynyń chempıony, qytaılyq sportshy Gýn Lı fınaldyq jekpe-jekten keıin Kazinform tilshisine shaǵyn suhbat berip, qazaqstandyq qarsylasy Ásel Qanaı týraly aıtty.
Qytaılyq sportshynyń aıtýynsha, olar bir-birin óte jaqsy biledi.
— Biz kóp ret jekpe-jek ótkizdik, bir-birimizdi jaqsy bilemiz. Sol sebepti aıqas qarqyndy ótti. Ol óte úzdik sportshy, odan úırenetin jaqsy qasıetteri kóp. Qarsylasymdy kúmis júldesimen quttyqtaımyn. Qatelespesem, ol aldyńǵy Azııa oıyndarynda qola medal enshilegen edi. Jalpy, onyń deńgeıiniń kóterilgeni baıqalady. Oǵan sáttilik tileımin, — dedi ol.
Gýn Lıdiń aıtýynsha, barlyq qarsylas laıyqty óner kórsetti.
— Qarsylastarymnyń barlyǵy jeńis úshin kúresti. Men de árqashan óz deńgeıimdi kóterip, elime altyn júlde syılaý úshin barymdy saldym, — dedi qytaılyq karateshi.
Aıta keteıik, Gýn Lı Tokıoda ótken Olımpıada oıyndarynyń qola júldegeri, Hanchjoý Azııa oıyndarynyń chempıony. Sonymen qatar, qytaılyq sportshy Álem jáne Azııa chempıonatynyń altyn medalin jeńip alǵan.
Osyǵan deıin habarlaǵanymyzdaı, Ásel Qanaı áıelder arasynda 61 kg salmaqta kýmıte baǵdarlamasynda qytaılyq Gýn Lıǵa 8:2 esebimen jeńilip, kúmis júlde enshiledi.
Jarystan keıin qazaqstandyq karateshi Kazinform tilshisine fınaldyq aıqasy jáne aldaǵy josaprlary týraly aıtyp berdi.
