Qytaılyq avtomobıl brendteriniń Qazaqstandaǵy bolashaǵy zor – Shı Tsınke
ASTANA. KAZINFORM – Ótken jyly alǵash ret álemdegi eń iri avtomobıl eksporttaýshysy bolǵannan keıin Qytaı 2024 jyly avtomobıl eksportynyń ósý úrdisin jalǵastyrdy.
Qytaı avtomobıl óndirýshileri qaýymdastyǵynyń statıstıkalyq málimeti boıynsha, Qytaıdyń avtomobıl eksportynyń kólemi osy jyldyń shilde aıynda 469 myń danaǵa jetip, ótken jylmen salystyrǵanda 19,6 paıyzǵa ósti.
Qytaıdyń 2024 jyldyń alǵashqy jeti aıynda kólik quraldarynyń jalpy eksporty 3,26 mıllıon dana boldy (2023 jyldyń sáıkes kezeńimen salystyrǵanda 28,8% ósti), onyń 700 myńy elektrli kólikter.
Sonymen birge Ortalyq Azııa qytaılyq avtomobıl óndirýshileri baǵalaǵan naryqtyń birine aınaldy. Ortalyq Azııadaǵy eń iri naryq Qazaqstanda Qytaıdyń Great Wall Motors avtokompanııasy ótken jyly 8 824 kólik satqan. Great Wall Motors halyqaralyq bıznes departamentiniń prezıdenti Shı Tsınke Great Wall Motors qazaqstandyq naryqqa tolyq senim artatynyn aıtty.
«Qytaı men Qazaqstan arasyndaǵy ekonomıkalyq jáne saýda qarym-qatynastary tereńdeı túsken saıyn, qytaılyq avtomobıl brendteriniń Qazaqstandaǵy bolashaǵy zor bolady dep oılaımyn», - dedi ol.
Qazirgi ýaqytta Great Wall Motors-tyń Qazaqstanda 20 iri qalany qamtıtyn 28 dılerlik keńsesi bar. Kompanııa osy jyldyń úshinshi toqsanynda Almaty men Astanada jańa dılerlik ortalyqtar ashýdy josparlap otyr.
Qytaıdyń taǵy bir avtokólik kompanııasy Geely Automobile 2022 jyldyń sońynan bastap Qazaqstanda iri qalalardy qamtıtyn 16 dılerlik jáne avtosalondar ashty. Kásiporyn qazirgi tańda qazaqstandyq naryqta 7 úlgini usynady. Geely Ortalyq Azııa elderi qytaılyq avtoóndirýshiler úshin mańyzdy ósý qozǵaltqyshyna aınalyp otyrǵanyn aıtty. Kásiporyn Qyrǵyzstan naryǵyna ótken jyly kirgen, endi óz ónimderin Ózbekstan, Tájikstan jáne Túrkimenstanǵa eksporttaýdy kózdep otyr.
Aıta ketý kerek, Qazaqstandyq Orbis Kazakhstan kompanııasy Almaty ındýstrııalyq parkinde tolyq tsıkldi avtomobıl zaýytyn salýdy josparlap otyr. Joba aıasynda QHR-dyń Exeed jáne Kaiyi sekildi brendteri bir óndiris alańynda birigedi.
Budan bólek, Almatyda Chery, GWM (Haval), Changan avtokólikterin shyǵaratyn mýltıbrendti Astana Motors Manufacturing Kazakhstan zaýyty salynyp jatyr. Kásiporyn jylyna 90 myń avtokólik shyǵarady dep josparlanǵan.
