Qytaılyq arheologtar kóne qabirden Ortaazııalyq stıldegi altyn-kúmis buıymdardy tapty
ASTANA. KAZINFORM – Qytaılyq arheologtar Tan dáýirine tán qabirden qysh, farfor jáne qola buıymdar, sondaı-aq Ortaazııalyq stıldegi altyn-kúmis áshekeıler qazyp aldy. Bul týraly Sınhýa agenttigi habarlady.
2022 jyldyń qańtary men 2024 jyldyń sáýiri aralyǵynda Sıan qalasynyń Chanan aýdanynyń Tszıalı aýyly aýmaǵynda jańǵyrtý jumystary júrgizilýine baılanysty, Shensı Arheologııa ınstıtýty qurylys alańyndaǵy kóne qorymdarǵa arheologııalyq zertteý júrgizgen. Qazba jumystary kezinde M228 nómirli qabir ashylyp, mola ıesiniń Saraı kúzeti sol qanatynyń jetekshisi Dýn Shýnsıanniń jubaıy Ma Sannıan ekeni anyqtaldy. 698 jyly kómilgen qabirden barlyǵy 19 dana (top) artefakty tabylǵan. Olardyń qatarynda qysh jáne farfor ydystar, qola, temir, altyn, kúmis jáne tas buıymdar bar. Ásirese altyn taraq, úsh sıraqty kúmis ydys, kúmis kýbok sekildi zattar kórkemdigimen kóz tartady.
Shensı Arheologııa ınstıtýtynyń ǵylymı qyzmetkeri Shı Shenniń aıtýynsha, qabirden shyqqan altyn-kúmis buıymdardyń deni – áıelderge arnalǵan áshekeıler men zattar saqtalatyn ydystar. Kúmisten jasalǵan úsh sıraqty qumyra men kýboktyń búıirinde Ortalyq Azııa aımaǵyna tán júzim men ushqat órnekteri beınelengen. Ǵalymnyń pikirinshe, qabirden tabylǵan altyn-kúmis buıymdar men sasanılik kúmis teńgeler aıryqsha nazar aýdarýǵa turady jáne óz kezeńindegi álemdik mádenı baılanys pen saýda qatynastaryn zertteýge mańyzdy derekkóz usynady.
Buǵan deıin Qytaıdyń Shensı provıntsııasynda merzimi shamamen 3 000 jylǵa jýyqtaıtyn 31 kóne qabirden turatyn keshen tabylǵany týraly jazǵan bolatynbyz.