Qytaılyq «alhımık» qoqysty 29 myń dollarlyq altynǵa aınaldyrdy

ASTANA. KAZINFORM — Qytaıdyń Gýandýn provıntsııasynan shyqqan affınaj salasynyń kásibı mamany elektrondy qaldyqtan 29 myń dollardyń altynyn óndirip alǵany kórsetilgen vıdeo Qytaıdyń áleýmettik jelilerinde úlken qyzyǵýshylyq týdyrdy, dep habarlaıdy Kazinform menshikti tilshisi South China Morning Post basylymyna silteme jasap.

Hýeıchjoý qalasynyń turǵyny, Tsıao tegimen tanymal sheber eki tonna elektrondy qaldyqty qaıta óńdeý protsesin kórsetip, nátıjesinde 191 gramm altyn alynǵanyn kórsetti. Vıdeo qysqa ýaqyt ishinde bes mıllıonnan astam qaralym jınady.

Vıdeo jarııalanǵannan keıin qytaılyq marketpleısterde eski SIM-kartalardy satý týraly habarlandyrýlar sany kúrt artty. Lottardyń biri az ýaqyt ishinde 100-den astam tapsyrys pen 10 myń qaralym jınaǵan.

Qytaılyq áleýmettik jeli qoldanýshylary Tsıaony «Alhımık» dep atap ketti. Biri buryn tastalǵan kompıýter qaldyqtaryn ókinishpen eske alsa, endi biri bul istiń syrt kózge ońaı kóringenimen, shyn máninde hımııa salasyndaǵy tereń bilim men úlken tájirıbeni qajet etetinin atap ótti.

Óz kezeginde sheber Tsıao áýesqoılardy bul protsesti úı jaǵdaıynda qaıtalaýǵa bolmaıtynyn qatań túrde eskertti, sebebi ol ómirge qaýipti ári zańǵa qaıshy bolýy múmkin.

— Men elektrondy qaldyqtardyń belgili bir túrlerin barlyq qajetti sertıfıkattarǵa ıe bola otyryp, zańdy túrde qaıta óńdeımin. Negizgi maqsatym — óz tájirıbemmen bólisý, — dedi ol.

Qytaıda baǵaly metaldardy qaıta óńdeý qyzmeti arnaıy lıtsenzııalaýdy talap etedi. Zańsyz óńdeý úshin salynatyn aıyppul 500 myń ıýanǵa (72 myń AQSh dollary) deıin jetýi múmkin, al qorshaǵan ortaǵa zııan keltirilgeni dáleldense, bas bostandyǵynan aıyrý jazasy da qarastyrylǵan.

Buǵan deıin altyn baǵasy tarıhta alǵash ret 5600 AQSh dollarynan asqanyn jazǵan edik.