Qytaılar qartaıyp barady: aldaǵy 10 jylda 60-tan asqandar sany 400 mln-nan asady
ASTANA. KAZINFORM – Qytaıda aldaǵy on jylda 60 jastan asqan adamdar sany 400 mıllıonnan asady dep kútilýde. Osyǵan baılanysty el bıligi halyqtyń qartaıýy máselesin sheshý sharalaryn kúsheıtip jatyr, dep habarlaıdy Sınhýa.
2025 jyldyń sońyndaǵy derek boıynsha, Qytaıda 60 jastan asqan 320 mıllıonnan astam adam bolǵan. Bul – el halqynyń shamamen 23 paıyzy.
Bılik bul máselege qarsy naqty qadamdar jasap jatyr. Máselen, 2030 jylǵa qaraı qalalyq aýdandar men aýyldardyń keminde 70 paıyzy qarttarǵa kútim kórsetetin mekemelermen qamtylýy tıis. Sondaı-aq qıyn jaǵdaıda qalǵan egde jastaǵy azamattarǵa turaqty túrde baryp, kútim kórsetý tetikterin engizý josparlanyp otyr.
Sarapshylar halyqtyń qartaıýy men genderlik teńgerimsizdiktiń negizgi sebepteriniń biri retinde 1970 jyldardyń sońynda engizilgen «bir otbasy – bir bala» saıasatyn ataıdy. Sonyń saldarynan elde týý kórsetkishi tómendegen.
Keıin bılik bul shekteýlerdi birtindep jeńildetti: 2013 jyly belgili bir otbasylarǵa ekinshi balaǵa ruqsat berilse, 2016 jyly barlyq otbasylarǵa qatysty boldy. Al 2021 jyly úshinshi balaǵa da ruqsat etildi. Soǵan qaramastan, týý deńgeıi aıtarlyqtaı ósken joq.
Sońǵy derekterge sáıkes, ótken jyly Qytaı halqy 3,39 mıllıon adamǵa azaıyp, 1,404 mıllıardty quraǵan.
Aıta keteıik, buǵan deıin Qytaıda bir áıel bes bala – tórt qyz jáne bir ul dúnıege ákelgen edi. Medıtsına mamandarynyń aıtýynsha, tabıǵı jolmen birden bes bala týý yqtımaldyǵy 60 mıllıon jaǵdaıdyń bireýinde ǵana kezdesedi.
Eske sala ketsek, Qytaı 30 jylda alǵash ret «Túrmeler týraly» zańdy aýqymdy túrde jańartqanyn jazdyq.
