Qytaıǵa saparym barysynda kópmıllıardtyq kelisimder jasaldy — Toqaev

ASTANA. KAZINFORM — Memleket basshysy Qasym-Jomart Toqaev jaqynda bolyp kelgen Qytaıǵa resmı sapardyń nátıjesimen bólisti. 

— Meniń Qytaıǵa jasaǵan sońǵy saparym barysynda álemdik deńgeıdegi kompanııalarmen kópmıllıardtyq kelisimder jasaldy. Sol kompanııalardyń biri jahandyq Shenzhen tehnopolısin salýǵa qatysqan jáne ol Alatau City jobasyn júzege asyrýǵa tikeleı atsalysady. Kelesi qadam — Alatau City úshin berik ınstıtýtsıonaldyq negiz qurý, — dedi Qasym-Jomart Toqaev Qazaqstan halqyna Joldaýy barysynda.

Osy oraıda Memleket basshysy 10 kún ishinde qalaǵa Úkimetke tikeleı baǵynatyn arnaıy mártebe berý týraly Jarlyq jobasyn daıyndaý qajettigin tapsyrdy.

— Odan keıin alty aıdan aspaıtyn merzim ishinde qala basqarý tártibi, qarjylyq modelder jáne ózge de mańyzdy aspektilerdi qarastyratyn jeke zań qabyldanýy tıis. Taǵy da atap ótemin, arnaıy quqyqtyq mártebe, bul artyqshylyq emes, qaǵaz júzinde qalyp qoımaý úshin qajet mindetti shara ári qural. Alatau City — óńirdegi alǵashqy tolyqtaı tsıfrlyq qala bolýy kerek. Smart City tehnologııalaryn engizýden bastap, taýarlar men qyzmetti krıptovalıýtamen tóleý múmkindigine deıin. Bul qala Qazaqstannyń bolashaǵynyń beınesin kórsetip, tehnologııalyq progresti ómir súrýge barynsha qolaıly ortamen úılestiredi, — dep tolyqtyrdy Prezıdent.

Buǵan deıin Qasym-Jomart Toqaev Úkimetke ınvestıtsııa tartý saıasatyn qaıta qaraý mindetin júktedi. 

Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.

Kazinform saıty tikeleı efırmen qatar, jazbasha translıatsııa da jasaıdy.

Sondaı-aq Joldaý mátinin agenttiktiń telegram arnasynan oqýǵa bolady.