Qytaıǵa kıikti syıǵa tartý protsesi qalaı júrip jatyr
ASTANA. KAZINFORM — Byltyr Qazaqstan Qytaıǵa 1500 kıikti syıǵa tartatyny málim boldy. Bul kıikterdi kórshi elge jetkizý protsesi qalaı júrip jatyr? Bul suraqqa Ekologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıteti jaýap berdi.
— Qytaı Halyq Respýblıkasyna 1500 kıikti berý máselesine toqtalsaq, Qazaqstan jaǵy kórshi elmen birqatar kelissóz júrgizdi. Kıikti qorǵaý salasyndaǵy yntymaqtastyq máseleleri talqylandy, sondaı-aq QHR tarapymen Ózara túsinistik týraly memorandýmǵa qol qoıyldy. Sonymen qatar, qytaılyq tarap kıikterdi tek aýsyl aýrýynan taza dep tanylǵan Qazaqstan Respýblıkasy oblystarynyń aýmaǵynda aýlaý qajettiligi týraly habarlady, — delingen Orman sharýashylyǵy jáne janýarlar dúnıesi komıtetiniń Kazinform agenttigine bergen jaýabynda.
Aıta ketý kerek, 2026 jylǵy 22 mamyrda Parıjde ótken Dúnıejúzilik janýarlar densaýlyǵy uıymynyń 93-shi Bas sessııasynda Qazaqstanǵa resmı túrde vaktsınatsııa júrgiziletin aýsyldan taza aımaq mártebesi berildi.
— Osyǵan baılanysty qazirgi ýaqytta taraptar kıikterdi QHR-ǵa eksporttaý úshin veterınarııalyq-sanıtarlyq sertıfıkatty ázirleýde. Bul baǵyttaǵy jumystar jalǵasyp jatyr, — dep túsindirdi vedomstvo.
Eske salsaq, byltyr Qazaqstan Qytaıǵa 1500 kıikti syıǵa tartatyny málim boldy.
Atap aıtqanda, kıikterdi qabyldaýshy el olardy ary qaraı ustaýǵa qolaıly jaǵdaılar jasaýy tıis.
Bul jaǵdaılar kıikterdiń tabıǵı mekendeý ortasyna jaqyn bolýy, olardyń qorektenýine, kóbeıýine jáne aýrýlardan qorǵalýyna qajet ınfraqurylymdy qamtýy kerek.
Bul rette qazaqstandyq tarap jiberiletin janýarlar úshin barlyq qajet jaǵdaılardyń jasalǵanyna kóz jetkizý maqsatynda tıisti tekserýler men monıtorıng júrgizýge quqyly.
