Nysanbaev: Qytaıǵa kıikti syıǵa tartý — ekojúıege, agrarlyq sektorǵa áser etpeıdi

ASTANA. KAZINFORM — Ekologııa jáne tabıǵı resýrstar mınıstri Erlan Nysanbaev elimizdiń Qytaıǵa 1500 kıikti syıǵa tartýyna qatysty oıyn ortaǵa saldy.

— Shyn máninde bul kıikterdiń taralý aımaǵy. Biz búginde álemdik popýlıatsııanyń 99 paıyzyn ıelenip otyrmyz. Meniń oıymsha, kıikterdiń popýlıatsııa turaqtylyǵyn qamtamasyz etý úshin olardy baıyrǵy mekenine qaıtarý kerek. Osylaısha biz kıik popýlıatsııasynyń jalpy turaqtylyǵyn nyǵaıtamyz, bul óte mańyzdy, — dedi Erlan Nysanbaev Májilis qabyrǵasynda tilshilerdiń saýalyna jaýap bere turyp. 

Mınıstrdiń málimdeýinshe, Qytaıǵa 1,5 myń kıikti syıǵa tartý, ekojúıege jáne agrarlyq sektorǵa áser etpeıdi.

— 1500 kıik eshqandaı ról atqarmaıdy. Biraq, turaqtylyqty qamtamasyz etý jaǵynan kómektesedi, — deıdi ol.

Sondaı-aq vedomstvo basshysy kıikterdi berý merzimi ázirge naqty belgisiz ekenin aıtty. 

— Jaqynda bizdiń jáne Qytaı ǵalymdarymen tikeleı jumysty bastaımyz. Birinshiden, Qytaı ǵalymdary kıik mekendeıtin jerdi aralap, jaıylym bazasy tolyq pa, joq pa sony tekserýi qajet. Sodan keıin kóshirý tásilderi qarastyrylady, qandaı tásil ońtaıly, sony tańdaımyz, — dep tolyqtyrdy E. Nysanbaev.

Keshe belgili bolǵandaı Qazaqstan Qytaıǵa 1500 kıik tartý etedi. 

Osy oraıda Kazinform «Qytaıda kıik bar ma» degen taqyrypta sholý jasady.