Qytaıǵa et eksporttap, 2,5 mlrd dollar tabys tabýǵa bolady – depýtat

Parlament Májilisiniń depýtaty Aıdarbek Qojanazarov mal sharýashylyǵy salasynyń eksporttyq áleýeti týraly aıtyp berdi, dep habarlaıdy Kazinform tilshisi.

«Aýyl sharýashylyǵy sııaqty dástúrli óndirister jóninde etti mal sharýashylyǵynda jumys isteı bastaǵan klaster mysalyn keltirýge bolady. Bul klasterdiń negizi salqyndatylǵan sıyr men qoı etine, tiri malǵa, muzdatylǵan etke naryqtyq suranys boldy. 2009 jyly Qytaıda sıyr men qoı etiniń ımporty 50 myń tonna, 2018 jyly – 3 mln tonna bolǵan. Bul rette Qazaqstanda óndiris múmkindikteri jer resýrstarymen shektelmeıdi, jaıylymdyq alqaptardyń aýdany boıynsha álemde 5-shi oryndamyz (180 mln ga), qazirgi ýaqytta onyń 30%-y paıdalanylady», - dedi A. Qojanazarov elordada «Ózgeris dáýirindegi eńbek naryǵy» atty halyqaralyq konferentsııasynda.

Sarapshylar Qytaıǵa jetkizýshiler qataryna kirý úshin Qazaqstanǵa iri qara mal basyn 8 mıllıonnan 15 mln basqa deıin ulǵaıtý qajet dep esepteıdi.

«Bul 500 myń tonnaǵa deıin sıyr etin eksporttaýǵa múmkindik beredi. Bir keli sıyr etiniń baǵasy AQSh dollarynan bolsa, jyl saıyn jalpy kiris 2,5 mlrd dollarǵa deıin jetedi. Eksporttyq kiris fermerlerge jáne salanyń basqa qatysýshylaryna birkelki bólinedi jáne basqa da salalardy damytady», - dedi Aıdarbek Qojanazarov.

Aıta keteıik, elordada «Ózgeris dáýirindegi eńbek naryǵy: syn-tegeýrinder, jańartýlar jáne perspektıvalar» atty halyqaralyq konferentsııa ótýde.

Onda otandyq jáne sheteldik sarapshylar álemdik ekonomıkanyń qazirgi jaǵdaıy men perspektıvalaryn, jahandyq eńbek naryǵynyń damý úrdisterin, sapaly jumys oryndaryn qurý múmkindikterin jáne olarǵa bıznes-ortanyń áserin, tehnıkalyq jáne kásiptik bilim berý salasyndaǵy qajetti ózgeristerdi, sondaı-aq álemde adamı kapıtaldy damytý máseleleri talqylanady.