Qytaıǵa eksport: Úrimjide Qazaqstannyń arnaıy is-sharasy ótti - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Qazaqstan men Ózbekstan bilim salasyndaǵy yntymaqtastyqty keńeıtedi – ÓzA
Ózbekstan men Qazaqstan mektepke deıingi jáne mektep bilimi salasyndaǵy yntymaqtastyqty odan ári keńeıtýdi kózdep otyr. Bul másele Ózbekstan Respýblıkasynyń Mektepke deıingi jáne mektep bilim berý mınıstri Ezoza Karımova men Qazaqstan Respýblıkasynyń Oqý-aǵartý mınıstri Juldyz Súleımenovanyń kezdesýinde talqylandy, dep habarlaıdy «ÓzA» aqparat agenttigi.
Habarlamada aıtylǵandaı, taraptar eki el basshylarynyń saıasatynyń arqasynda bilim berý salasyndaǵy áriptestik jańa deńgeıge kóterilgenin atap ótti. Sondaı-aq oqýshylar men pedagogterdiń halyqaralyq pán olımpıadalaryna, forýmdar men ǵylymı-tájirıbelik konferentsııalarǵa belsendi qatysýy joǵary baǵalandy.
Kezdesýde pedagogterdiń biliktiligin arttyrý, bilim berý úderisine jasandy ıntellekt tehnologııalaryn engizý boıynsha tájirıbe almasý jáne birlesken jobalardy iske asyrý máseleleri talqylandy. Taraptar bul kelissózder Qazaqstan men Ózbekstan arasyndaǵy bilim berý salasyndaǵy yntymaqtastyqty odan ári nyǵaıtýǵa yqpal etetinin aıtty.
Sondaı-aq, osy aptada«ÓzA»-da «Ózbekstanda biryńǵaı ulttyq QR-kod júıesi kezeń-kezeńimen engiziledi» degen taqyryptaǵy aqparat jaryq kórdi.
Atalǵan basylymnyń málimetinshe, Ózbekstanda qolma-qol aqshasyz tólemderdiń úlesin arttyrý jáne kásipkerlerdiń shyǵyndaryn azaıtý maqsatynda Biryńǵaı ulttyq QR-kod júıesi (UzQR) kezeń-kezeńimen iske qosylady. Jańa júıe tutynýshylarǵa qaı banktiń nemese tólem uıymynyń mobıldi qosymshasyn paıdalansa da, bir ǵana QR-kod arqyly tólem jasaýǵa múmkindik beredi.
Ózbekstan Ortalyq bankiniń málimetinshe, UzQR júıesinde tólemder úshin biryńǵaı komıssııa mólsherlemesi 0,65 paıyz bolyp belgilendi. Bul qazirgi qoldanystaǵy 1–3 paıyzdyq QR-tólem tarıfterinen aıtarlyqtaı tómen. Sonymen qatar Uzcard jáne Humo júıeleriniń ulttyq emes QR-sheshimderine qoldanylatyn tarıf te 0,10 paıyzǵa deıin qysqartylady.
Jańa júıede tólem jasaýshy tutynýshylardan komıssııa alynbaıdy, tarıfti tek saýda jáne qyzmet kórsetý sýbektileri tóleıdi. Bılik ókilderiniń aıtýynsha, UzQR kásipkerlerdiń shyǵyndaryn azaıtyp, tólem qyzmetteri naryǵyndaǵy básekelestikti arttyrýǵa jáne tsıfrlyq ekonomıkanyń damýyna yqpal etedi.
Qazaqstan men Iran qylmystyq-quqyqtyq saladaǵy yntymaqtastyqty arttyrady – Eurasia Today
Qazaqstan men Iran qylmystyq-quqyqtyq saladaǵy ekijaqty yntymaqtastyqty odan ári damytý máselelerin talqylady. Bul másele Mańǵystaý oblysynyń prokýrory Serikqalı Kúshálıev pen Iran Islam Respýblıkasynyń Aqtaýdaǵy Bas konsýly Djafar Zamanıdiń kezdesýinde qaraldy, dep jazady Eurasia Today aqparat agentti.
Atalǵan basylymnyń málimetinshe, kezdesý barysynda taraptar qylmystyq ister boıynsha ózara quqyqtyq kómek kórsetý, izdeýde júrgen tulǵalardy ekstradıtsııalaý jáne quqyq qorǵaý organdary arasyndaǵy yntymaqtastyqtyń ózekti baǵyttaryn talqylady. Sondaı-aq óńirlik prokýratýranyń qyzmeti men azamattardyń quqyqtary men zańdy múddelerin qorǵaý máselelerine nazar aýdaryldy.
Irannyń Bas konsýly óz eliniń azamattarynyń quqyqtaryn qorǵaý baǵytyndaǵy konsýldyqtyń jumysy týraly aıtyp, ekijaqty baılanystardy odan ári tereńdetýge daıyn ekenin jetkizdi. Kezdesý qorytyndysynda taraptar quqyqtyq saladaǵy ózara is-qımyldy jalǵastyryp, turaqty yntymaqtastyqty nyǵaıtýǵa ýaǵdalasty.
Úrimjide «Qytaıǵa eksport» Qazaqstan arnaıy is-sharasy ótti – Halyq gazeti
Qytaıdyń Úrimji qalasynda «Qytaıǵa eksport» Qazaqstan arnaıy is-sharasy jáne IX Qytaı halyqaralyq ımport kórmesiniń ınvestıtsııalyq jármeńkesi ótti.
Bul týraly osy aptada Halyq gazeti basylymy habarlady.
Qytaılyq BAQ-tyń málimetinshe, is-sharaǵa Qazaqstan Premer-mınıstriniń orynbasary – Ulttyq ekonomıka mınıstri Serik Jumanǵarın men Shyńjań Uıǵyr avtonomııalyq regıonynyń tóraǵasy Árkin Tunııaz qatysty. Qytaı halyqaralyq ımport kórmesi bıýrosy dırektorynyń orynbasary Ge Hýn kórmeniń segiz jyl qatarynan tabysty uıymdastyrylǵanyn aıtyp, qazaqstandyq kásiporyndardy óz ónimderin tanystyryp, halyqaralyq seriktester tabýǵa shaqyrdy.
Sharaǵa 30-dan astam qazaqstandyq eksporttaýshy jáne Shyńjań men Qytaıdyń ózge óńirlerinen kelgen 200-den astam satyp alýshy kásiporyn men salalyq uıym qatysty. Kezdesý barysynda qazaqstandyq jáne qytaılyq kompanııalar iskerlik baılanys ornatyp, eksporttyq yntymaqtastyqty keńeıtý máselelerin talqylady.
Sonymen qatar osy aptada Halyq gazeti basylymynda «Qytaı men Qazaqstan QR-kod tólem júıelerin ózara úılestirdi» degen aqparat jaryq kórdi.
Atalǵan BAQ-tyń keltirgen derekterine súıensek, Qytaı men Qazaqstan arasyndaǵy shekaraaralyq QR-kod tólem júıeleri ózara úılestirildi. Bul týraly Halyqaralyq UnionPay kompanııasy Shanhaıda Qazaqstannyń Ulttyq tólem kompanııasymen (NPCK) birlesken yntymaqtastyq aıasynda habarlady.
Taraptar shekaraaralyq QR-kodtardy ıntegratsııalaý jáne úılestirý jónindegi memorandýmǵa qol qoıdy. Qujatqa UnionPay bas atqarýshy dırektory Van Lısın men NPCK bas atqarýshy dırektory Janar Samaeva qol qoıdy.
Kelisim aıasynda «Yunshanfu» qosymshasy jáne UnionPay seriktes platformalary arqyly Qazaqstanǵa kelgen týrıster eldegi QR-kod júıesine qosylǵan mıllıondaǵan saýda núktelerinde tikeleı tólem jasaı alady. Bul sheshim eki el arasyndaǵy tsıfrlyq tólemder men saýda baılanysyn jeńildetýge baǵyttalǵan.
Tegeran ǵalymdary Parkınsondy emdeýde tuzdyń rólin zerttedi – ParsToday
Tegeran ýnıversıtetiniń ǵalymdary júrgizgen jańa zertteý dene tinderindegi natrıı hlorıdi tuzynyń kontsentratsııasy Parkınson aýrýyn mıdyń tereń elektrlik stımýlıatsııasy ádisimen emdeýdiń tıimdiligine áser etýi múmkin ekenin anyqtady, dep jazdy ParsToday aqparat agenttigi.
Irandyq BAQ-tyń dereginshe, zertteý ýnıversıtettiń Bıohımııa jáne bıofızıka zertteý ortalyǵyndaǵy Bıotermodınamıka zerthanasynda júrgizildi. Ǵalymdardyń aıtýynsha, natrıı hlorıdi Parkınson aýrýymen baılanysty «alfa-sınýkleın» aqýyzynyń agregatsııasyna yqpal etip, emdeý nátıjesine áser etýi yqtımal.
Zertteýdi doktor Alıakbar Sabýrı men doktor Parısa Ibrahımı basqardy. Avtorlar bul jańalyq Parkınson aýrýyn elektrlik stımýlıatsııa arqyly emdeý tásilderin jetildirýge jáne emniń tıimdiligin arttyrýǵa múmkindik berýi múmkin ekenin atap ótti.
Túrki memleketteri arasynda elektrondyq saýda men tsıfrlyq qyzmetter jeńildeıdi – TRT
Túrki Memleketteri Uıymyna múshe elder arasynda tsıfrlyq ekonomıka salasyndaǵy áriptestikti damytýǵa baǵyttalǵan kelisim aıasynda elektrondyq saýda, tsıfrlyq qyzmetter jáne transshekaralyq derekterge negizdelgen ekonomıkalyq qyzmetterdegi kedergilerdi azaıtý kózdelip otyr. Bul týraly osy aptada Túrkııa Radıo Televızııa portaly habarlady.
Atalǵan BAQ-tyń keltirgen málimetterine súıensek, Túrkııanyń Saýda mınıstrligi habarlaǵandaı, «Túrki Memleketteri Uıymyna múshe memleketter arasyndaǵy Tsıfrlyq ekonomıka jónindegi áriptestik týraly kelisimdi ratıfıkatsııalaý týraly zań» Resmı gazette jarııalandy. Osylaısha Túrkııa Ázerbaıjan men Ózbekstannan keıin kelisimdi ishki deńgeıde bekitken úshinshi el atandy.
Mınıstrliktiń habarlaýynsha, kelisim Qazaqstan men Qyrǵyzstan da ishki ratıfıkatsııalaý rásimderin aıaqtaǵannan keıin kúshine enedi. Qujat tsıfrlyq ekonomıka salasynda ortaq erejelerdi qalyptastyryp, elder arasyndaǵy yntymaqtastyqty nyǵaıtýǵa baǵyttalǵan.
Kelisim aıasynda kásiporyndardyń tsıfrlyq naryqtarǵa qoljetimdiligin jeńildetý, ınnovatsııalyq tehnologııalardy qoldanýdy yntalandyrý jáne óńirdiń básekege qabilettiligin arttyrý kózdelgen.
Sondaı-aq, osy aptada «TRT» basylymynda «Túrkııaǵa qonys aýdarǵandardyń sany 25,2 paıyz ósti» degen taqyryptaǵy aqparat jarııalandy.
Atalǵan BAQ-tyń dereginshe, Túrkııaǵa qonys aýdarǵandardyń sany 2025 jyly aldyńǵy jylmen salystyrǵanda 25,2 paıyzǵa artyp, 393 myń 829 adamǵa jetti. Bul týraly Túrkııanyń Statıstıka basqarmasy jarııalaǵan halyqaralyq kóshi-qon statıstıkasynda málim boldy.
Immıgranttardyń 56,6 paıyzy erler, 43,4 paıyzy áıelder. Olardyń 91 myń 952-si Túrkııa azamattary, al 301 myń 877-si shetel azamattary. Al Túrkııadan shetelge qonys aýdarǵandardyń sany 5 paıyzǵa azaıyp, 403 myń 216 adamdy qurady. Al el ishindegi qalalar arasynda eń kóp kósh qabyldaǵan ári eń kóp kósh bergen qala – Stambýl.
Elge kelgen sheteldik azamattardyń ishinde eń joǵary úles Túrikmenstan azamattaryna tıesili – 23,4 paıyz. Odan keıin Ázerbaıjan (8,3%), Ózbekstan (6,9%), Mysyr (6,1%) jáne Aýǵanstan (5,8%) azamattary tirkeldi.
