Qytaıǵa aýyl sharýashylyǵy daqyldaryn eksporttaý kólemi artady

ASTANA. KAZINFORM — Qytaıǵa aýyl sharýashylyǵy daqyldaryn eksporttaý kólemi artady. Bul týraly Parlament Májilisinde agroónerkásip kesheni ónimderiniń eksporty taqyrybyna arnalǵan dóńgelek ústel otyrysynda Aýyl sharýashylyǵy vıtse-mınıstri Erbol Tasjúrekov málim etti.

— Ósimdik sharýashylyǵy ónimderin ilgeriletý boıynsha karantın jáne ósimdikterdi qorǵaý salasyndaǵy yntymaqtastyq týraly kelisimderge qol qoıý arqyly jańa naryqtar ashylyp keledi. Osylaısha, Ázerbaıjan, Túrkııa, Iran, Túrikmenstan, Qytaı jáne TMD elderimen osyndaı kelisimder jasaldy. Jyl saıyn Qytaıǵa eksporttaýshylar reestrinde otandyq kásipkerlerdiń sany artyp keledi, qazirgi tańda 2 432 qazaqstandyq kásipker tirkelgen. Qytaı naryǵyna burshaq, jasymyq jáne raps sııaqty ónimderdi jetkizý boıynsha kelisimder bekitildi. Sonymen qatar 2026 jylǵa deıin kúrish, mash, maqta jáne baqsha daqyldary sııaqty ónimder túrlerin keńeıtý josparlanǵan, — dedi Erbol Tasjúrekov.

Onyń aıtýynsha, bıdaı men un eksportyndaǵy oń dınamıkaǵa qaramastan, salanyń birqatar problemasy bar. Qazaqstan — Qytaı shekarasyndaǵy keden rásimderiniń uzaqtyǵy 5-ten 15 kúnge deıin sozylyp, konteınerlik poezdar, jabyq vagondar men astyq tıegishteriniń jınaqtalýyna jáne toqtap qalýyna sebep bolyp otyr.

Qazir Qorǵastaǵy vagondardyń barlyq túri (astyq tasymaldaıtyn vagondar, jabyq vagondar, konteınerler) boıynsha Qytaı tarapynyń astyq júkterin qabyldaýyn ulǵaıtý talqylanyp jatyr.

Budan buryn habarlanǵandaı, Qazaqstannyń agroónerkásip ónimderiniń eksporty 60-tan astam elge shyǵyp jatyr.