Qytaıǵa 488 mıllıon teńgeniń altynyn alyp ótpek bolǵan er adam sottaldy

ASTANA. KAZINFORM — Jetisý oblysynda quny 488 mıllıon teńge bolatyn 5,7 keli altyndy Qytaıǵa zańsyz alyp ótpek bolǵan Almaty turǵyny sottaldy. Ol baǵaly metaldy kedendik baqylaýdan jasyrý úshin denesine jabysqaq taspamen bekitip alǵan.

sot
Foto: Kazinform/JI

Jetisý oblysy prokýratýrasynyń habarlaýynsha, oqıǵa «Qorǵas» Shekara mańy halyqaralyq yntymaqtastyq ortalyǵynyń keden beketinde bolǵan. Er adam asa iri mólsherdegi altyndy shekaradan zańsyz ótkizbek bolǵan.

Kedendik tekserý kezinde kontrabandalyq taýar anyqtalyp, ýákiletti organ qyzmetkerleri altyndy tárkiledi.

Sotta memlekettik aıyptaýshy er adamnyń ekonomıkalyq kontrabanda jasaýǵa oqtalǵanyn dáleldedi.

Panfılov aýdandyq sotynyń úkimimen ol kináli dep tanyldy. Salmaǵy 5 keli 764 gramm, quny 488 mıllıon teńge bolatyn altyn memleket kirisine ótkizildi.

Eske salaıyq, munyń aldynda Abaı oblysynda altyndy zańsyz óndirgen toǵyz adam anyqtalǵanyn jazǵan edik.