Qytaıdyń JІÓ ósý qarqyny 2025 jyly shamamen 5%

ASTANA. KAZINFORM – Qytaıdyń jalpy ishki óniminiń ósý qarqyny bıyl 5 paıyz shamasynda bolady dep josparlanyp otyr. Bul týraly sársenbi kúni eldiń joǵary zań shyǵarýshy organynyń jyl saıynǵy sessııasynyń ashylýynda Qytaı úkimetiniń baıandamasynda aıtylǵan, dep habarlaıdy Kazinform menshikti tilshisi.

Jumyssyzdyq deńgeıi 5,5 paıyz deńgeıinde saqtalyp, 12 mln-nan astam jańa jumys ornyn qurý josparlanǵan. Tutyný baǵalarynyń ındeksi (ınflıatsııa) shamamen 2%-ǵa ósedi dep kútilip otyr. Astyq óndirý kólemi 700 mln tonna shamasynda saqtalady. 

Qytaı úkimeti neǵurlym belsendi bıýdjet saıasatyn júrgizýdi kózdep otyr.

Bıýdjet tapshylyǵynyń JІÓ-ge qatynasy shamamen 4 paıyz bolyp, ótken jylmen salystyrǵanda 1 paıyzdyq pýnktke joǵary, al jalpy tapshylyq kólemi 5,66 trln ıýan bolyp, ótken jylǵydan 1,6 trln ıýan kóp bolady dep josparlanyp otyr. 

Qytaıdyń Búkilqytaılyq halyq ókilderi jınalysy (BHÓJ, parlament) 5 naýryzda jyl saıynǵy sessııasyn bastady. Ashylý saltanaty Beıjińdegi Tıananmen alańyndaǵy halyq jınalysy zalynda ótti.

Buǵan deıin 2025 jyldyń 5 naýryzynda Beıjińde 14-shaqyrylymdaǵy Búkilqytaılyq halyq ókilderi jınalysynyń úshinshi sessııasy jumysyn bastaıtynyn jazǵan bolatynbyz.