Qytaıdyń jeti óńirinde sý tasqyny qaýpine baılanysty tótenshe áreket etý rejımi engizildi
ASTANA. KAZINFORM — Qytaıdyń Sý resýrstary mınıstrligi «Noýl» taıfýny ákeletin nóser jaýynǵa baılanysty eldiń jeti óńirinde sý tasqynyna qarsy 4-deńgeıli tótenshe áreket etý rejımin engizdi, dep habarlaıdy Sınhýa.
Tótenshe rejım Fýtszıan, Tszıansı, Henan, Hýbeı, Hýnan, Gýandýn provıntsııalarynda jáne Gýansı-Chjýan avtonomııalyq aýdanynda jarııalandy. Bul óńirler Qytaıdyń shyǵys, ortalyq jáne ońtústik bóligin qamtıdy.
Vedomstvonyń málimetinshe, atalǵan aımaqtardaǵy ózenderde, sonyń ishinde Chjýtszıan, ıAntszy jáne Hýaıhe ózenderinde sý deńgeıiniń kóterilý qaýpi joǵary.
Mınıstrlik jergilikti sý sharýashylyǵy organdaryna aýa raıyn turaqty baqylaýdy, turǵyndarǵa der kezinde eskertý jasaýdy jáne sý tasqynyna qarsy ınjenerlik nysandardy tıimdi paıdalanýdy tapsyrdy.
Bıylǵy 12-taıfýn sanalatyn «Noýldyń» senbi keshinen jeksenbi tańyna deıin jaǵalaýǵa jetýi kútiledi. Osyǵan baılanysty mınıstrlik sý tasqynyna qarsy jumystardy úılestirý úshin zardap shegýi múmkin óńirlerge bes jumys tobyn jiberdi.
Sol kúni Qytaıdyń Tótenshe jaǵdaılardy basqarý mınıstrligi Tszıansı men Hýnan provıntsııalarynda geologııalyq apattar qaýpine baılanysty 4-deńgeıli tótenshe áreket etý rejımin engizdi. Al Gýandýn men Fýtszıan provıntsııalarynda buǵan deıin jarııalanǵan osyndaı rejım kúshinde qaldy.
Mınıstrlik qutqarýshylardy, qajetti tehnıka men materıaldyq qorlardy aldyn ala qaýipti aımaqtarǵa ornalastyrýdy, sondaı-aq qaýip tóngen eldi mekenderdiń turǵyndaryn der kezinde evakýatsııalaýdy tapsyrdy.
Qytaıda sý tasqynyna baılanysty tótenshe jaǵdaılarǵa áreket etýdiń tórt deńgeıli júıesi qoldanylady. Onyń ishinde 1-deńgeı – eń joǵary daıyndyq deńgeıi.
Aıta ketelik Qytaı taıfýn men sý tasqynynyń saldaryn joıýǵa 430 mıllıon ıýan bólgen edi.
