Qytaıdyń Jasandy ıntellekt salasyndaǵy yntymaqtastyq jónindegi jahandyq uıym qurý bastamasyn qoldaımyz - Prezıdent

ASTANA. KAZINFORM – Prezıdent tsıfrlandyrý salasyndaǵy Qytaıdyń jetistikteri búkil álemge belgili ekenin atap ótip, osy baǵytta tyǵyz baılanysta jumys isteýge nıet bildirdi.

Sarapshylardyń málimetine sáıkes, 2033 jylǵa qaraı jasandy ıntellekt naryǵynyń kólemi 5 trıllıon dollarǵa jetip, onyń álemdik tehnologııa ındýstrııasyndaǵy úlesi 30 paıyzǵa deıin artpaq. 

– Biz Qytaıdyń Jasandy ıntellekt salasyndaǵy yntymaqtastyq jónindegi jahandyq uıym qurý bastamasyn qoldaımyz. Bul másele boıynsha men keshe tarıhı shahar Tıantszın qalasynda ótken Shanhaı yntymaqtastyq uıymy sammıti kezinde ashyq túrde málimdeme jasadym. Qazaqstanda tsıfrlyq ekonomıkany damytý boıynsha júıeli sharalar qolǵa alynýda. Jasandy ıntellekt tehnologııasyn keńinen qoldanysqa engizý úshin aýqymdy jumys istelip jatyr. Bıyl Qazaqstanda aımaqtaǵy alǵashqy Sýperkompıýter iske qosyldy. Sondaı-aq AlemAI halyqaralyq jasandy ıntellekt ortalyǵy ashyldy. Biz «Alatau City» jańa qala salý jobasyna aıryqsha mán berip otyrmyz. Bul qala elimizde jáne tutas aımaqta ınnovatsııany, krıptoındýstrııa men tehnologııalyq kásipkerlikti damytýǵa jol ashatyn qýatty ortalyq bolýǵa tıis. Osy oraıda, biz qytaılyq kompanııalarmen ózara tyǵyz baılanysta jumys isteýge nıettimiz. Búgin China State Construction Engineering Corporation kompanııasy qazaq tarapymen tıisti kelisimge qol qoıady. Biz ony tolyq qoldaımyz. Qurylysty tez arada bastaý qajet dep oılaımyn. Jaqyn arada «Alatau City» birtutas ekojúıe retinde arnaıy mártebege ıe bolady, – dedi Qasym-Jomart Toqaev.

Aıta keteıik, Memleket basshysy Qazaqstan ekonomıkasyn ártaraptandyrýǵa jol ashatyn jobalarǵa toqtaldy.