Qytaıdyń jańa lazerlik júıeleri radıoelektrondyq kedergilerge tózimdi drondardy joıady
ASTANA. KAZINFORM - Qytaıdyń memlekettik buqaralyq aqparat quraldary drondarǵa qarsy kúreske arnalǵan eki jańa lazerlik júıeni tanystyrdy. Olardyń múmkindikteri shynaıy jaǵdaıǵa barynsha jaqyn ortada kórsetilgen. Bul týraly Global Times habarlady.
CCTV reportajynda «Gýantszıan-11E» jáne «Gýantszıan-21A» keshenderi kórsetilgen. Bul júıeler shaǵyn drondardy, sonyń ishinde tómen bıiktikte ushatyn apparattardy ustap qalýǵa arnalǵan. Mundaı jaǵdaıda dástúrli radarlardyń tıimdiligi tómendeıdi. Kadrlarda júıeler 50–80 metr bıiktikte jasyryn ushýdy ımıtatsııalaıtyn nysandardy joıady.
Keshender nysanany joıýdyń ártúrli tásilderin qoldanady. «Gýantszıan-21A» joǵary energııaly lazer arqyly drondy birneshe shaqyrym qashyqtyqta fızıkalyq túrde joıady. Apparattyń negizgi júıeleri sanaýly sekýndta isten shyǵady — bul «qatty» joıý ádisi. Al «Gýantszıan-11E» ımpýlstik lazer arqyly dronnyń elektronıkasy men basqarý júıesine áser etedi. Sonyń nátıjesinde apparat baǵdardan aıyrylyp, jumys qabiletin joǵaltady, biraq fızıkalyq turǵyda buzylmaıdy.
Eki júıe birigip, ártúrli qashyqtyq pen qaýip túrlerin qamtıdy. Bul ásirese radıoelektrondyq basýǵa tózimdi, talshyqty-optıkalyq basqarylatyn drondar keń taralǵan jaǵdaıda ózekti. Mundaı apparattardy beıtaraptandyrý úshin fızıkalyq nemese elektrondyq áser qajet.
Eki keshen de radıolokatsııalyq jáne ınfraqyzyl anyqtaý quraldarymen, ıntellektýaldy baǵyttaý júıelerimen jáne mýltısensorly modýldermen jabdyqtalǵan. Olar naqty ýaqyt rejıminde derek almasýdy qoldaıdy jáne biryńǵaı jaýyngerlik jelide jumys isteı alady.
Sarapshylardyń pikirinshe, lazerlik qarý joǵary dáldikpen jumys isteıdi, janama zalaldy azaıtady, paıdalaný shyǵyndary tómen jáne oq-dári qory is júzinde sheksiz. Qytaı mamandary lazerlik jáne mıkrotolqyndy qarý salasyndaǵy ázirlemeler eldi dronǵa qarsy qorǵanys baǵytynda aldyńǵy qatarǵa shyǵaryp otyr dep sanaıdy.
Osyǵan deıin Qytaıda ǵaryshta janarmaı quıatyn ıkemdi robot synaqtan ótkizilgen bolatyn.
