Qytaıdyń Xi’an Jiaotong University janynan «Shákárim» mádenı zertteýler ortalyǵy ashyldy
ASTANA. KAZINFORM – Qazaqstan men Qytaı arasyndaǵy ǵylymı-ınnovatsııalyq seriktestik jańa kezeńge qadam basty. Qytaıdyń Sıan Tszıaotýn ýnıversıtetinde «Bir beldeý – bir jol» bastamasynyń ozyq ǵylymı-tehnologııalyq jetistikterimen almasý jónindegi halyqaralyq konferentsııa uıymdastyryldy.
Konferentsııa aıasynda Sıan Tszıaotýn ýnıversıteti tarapynan Shákárim ýnıversıtetine «Elektrlik avtomattandyrý jónindegi Qazaqstan-Qytaı birlesken zerthanasyna» arnalǵan jabdyqtardyń alǵashqy partııasyn berý týraly estelik sertıfıkat tabys etildi. Sondaı-aq «Shákárim» Qazaq-Qytaı mádenı zertteýler ortalyǵynyń saltanatty ashylýy ótti.
QR resmı delegatsııasyn QR Ǵylym jáne joǵary bilim vıtse-mınıstri Gúlzat Kóbenova men Shakarim University rektory Dýman Orynbekov bastap bardy. Birlesken zerthana ashý jónindegi kelisimge 2025 jylǵy 16 maýsymda Astanada ótken «Ortalyq Azııa — Qytaı» ındýstrııalyq-ınvestıtsııalyq yntymaqtastyq forýmy aıasynda qol qoıylǵan bolatyn.
Jańadan qurylatyn zerthana eki el arasyndaǵy tehnologııa almasý men óndiristik seriktestikti damytýda mańyzdy ról atqaryp, ǵylymı jańalyqtarǵa negizdelgen ortaq ekonomıkalyq tizbektiń damýyn jyldamdatady. Jobanyń negizgi maqsaty — óńirdegi ınnovatsııalardy damytý, óndiristi jańartý jáne ǵylym men óndiris arasyndaǵy baılanysty nyǵaıtý.
Sondaı-aq zerthana logıstıka salasyndaǵy jańa tehnologııalardy zertteý men damytýǵa baǵyttalady. Munda avtomattandyrý, aqyldy logıstıka júıeleri men logıstıkalyq salany jetildirýge arnalǵan arnaıy platforma qurylady. Ol tolyqtaı Abaı oblysynyń óńirlik ınnovatsııalyq platformasyna ıntegratsııalanyp, qazaqstandyq ınjenerlik ǵylymnyń jańa tynysyn ashady dep kútilip otyr.
— Bul zerthana — ıdeıadan naqty iske aınalǵan seriktestiktiń aıqyn nátıjesi. Ǵylym men tehnologııa salasyndaǵy osyndaı yntymaqtastyq — Prezıdent Qasym-Jomart Toqaevtyń ınnovatsııalyq damý jáne ıntellektýaldy ult qalyptastyrý strategııasymen úndes, — dep atap ótti vıtse-mınıstr.
Kezdesýdiń basty oqıǵasy Sıan Tszıaotýn ýnıversıtetiniń janynan «Shákárim» Qazaq-Qytaı mádenı zertteýler ortalyǵynyń ashylýy boldy. Bul — uly oıshyldyń shyǵarmashylyǵy men fılosofııasyna arnalǵan sheteldegi tuńǵysh ınstıtýtsıonaldy ortalyq. Halyqaralyq deńgeıde ashylyp otyrǵan ortalyqtyń negizgi mindeti — Qazaqstannyń tarıhy men mádenıetin, sonyń ishinde Shákárim murasyn tereń zerdeleý, sondaı-aq birlesken bilim berý jáne ǵylymı-zertteý jobalaryn iske asyrýdaǵy ózara tıimdi platformany qalyptastyrý, qazaq mádenıetin Qytaıda keńinen tanystyrý, eki el arasyndaǵy mádenı jáne ǵylymı baılanystardy nyǵaıtý.
Ortalyq QR Ǵylym jáne joǵary bilim mınıstrliginiń qoldaýymen, Shákárim ýnıversıteti men Sıan Tszıaotýn ýnıversıtetiniń seriktestiginiń nátıjesinde ashylyp otyr. Kelýshiler ortalyqtan Shákárim Qudaıberdiulynyń ómiri men mol murasy týraly qazaq jáne qytaı tilderinde tolyq aqparat ala alady. Sonymen qatar qazaq halqynyń ejelgi dáýirden búginge deıingi mádenı damý kezeńderi týraly materıaldar usynylady.
Shákárim ýnıversıtetiniń rektory Dýman Orynbekov Xi’an Jiaotong University prezıdenti Chjan Lıtsıýnge jáne QR Ǵylym jáne joǵary bilim mınıstrligine eki eldiń akademııalyq jáne mádenı bastamalaryn senimge, ǵylymı progreske jáne ózara damýǵa negizdelgen biryńǵaı strategııaǵa biriktirgeni úshin shynaıy alǵys bildirdi.
«Shákárim» Qazaq-Qytaı mádenı zertteýler ortalyǵynyń ashylýy — erekshe mánge ıe tarıhı qadam. Bizdiń ýnıversıtet qazaq oıshyly Shákárimniń atynda. Sondyqtan ortalyqtyń ashylýy biz úshin úlken jetistik dep bilemin. Shákárim ýnıversıteti men Xi’an Jiaotong University arasyndaǵy seriktestik mádenıetter men urpaqtardy biriktiretin senim men dostyq keńistigin qalyptastyrady. Osy ortalyqty ashýǵa qyzmet jasaǵan eki ýnıversıtet qyzmetkerlerine raqmet aıtamyn. Bul ortalyq ǵylymı-mádenı jaǵynan eki eldiń jetistikterin nasıhattaýǵa qyzmet atqaratynyna senimdimin, — dedi ol.
Aıta ketelik qazaqstandyq stýdent Qytaıda ótken BRICS chempıonatynda qola medal ıegeri atanǵan edi.