Qytaıdyń valıýta qory keıingi 10 jyldaǵy eń joǵary kórsetkishke jetti
ASTANA. KAZINFORM – Qyrkúıek aıynda Qytaıdyń valıýta qory 3,3387 trıllıon dollarǵa deıin ósti. Bul – 2015 jyldyń qarashasynan bergi eń joǵary kórsetkish. AQSh dollaryna senimniń tómendeýine baılanysty eldiń altyn qory on birinshi aı qatarynan ósip otyr, dep habarlaıdy China Daily.
Memlekettik valıýta ákimshiligi turaqty makroekonomıkalyq kórsetkishter men joǵary sapaly damýǵa bet burý valıýta qorynyń turaqtylyǵyn qamtamasyz etetinin atap ótti.
BOCI ınvestıtsııalyq bankiniń halyqaralyq naryqtar jónindegi bas ekonomısi Gýan Tao Qytaıdyń 2015 jyldyń sońynan bergi rekordtyq rezervtik deńgeıi eldiń syrtqy kúshterge tótep berý jáne jahandyq qarjy ortasyndaǵy ózgeristerge qabiletiniń artqanyn kórsetetetinin basa aıtty.
Sarapshynyń paıymynsha, qordyń qyrkúıektegi artýy jahandyq qarjy aktıvteriniń qymbattaýy jáne Federaldy rezervtik júıeniń paıyzdyq mólsherlemeniń tómendeýinen keıin AQSh dollarynyń álsireýimen baılanysty bolǵan.
Qytaı Mınshen bankiniń bas ekonomısi Ven Bınniń aıtýynsha, rezervterdiń oń dınamıkasy Qytaı eksportynyń turaqtylyǵyn jáne ıýanmen eseptelgen aktıvterdiń tartymdylyǵyn kórsetedi.
– Saýda seriktesterin ártaraptandyrý, eksporttyq qurylymdy jaqsartý jáne AQSh-pen kelissózderdegi ilgerileý turaqty kapıtal aǵynyna yqpal etti. Al sheteldik ınvestorlardyń qytaılyq baǵaly qaǵazdar naryǵyna qoljetimdiligin keńeıtý ıýannyń halyqaralyq bedelin nyǵaıtady, - dedi ol.
Qytaılyq baǵaly qaǵazdarǵa taza sheteldik ınvestıtsııa 37,3 mıllıard dollardy qurady, bul 2024 jylǵy tolyq jyldyq kórsetkishten 26,6 mıllıard dollardan asyp tústi.
Qytaıdyń resmı altyn qory qyrkúıek aıynyń sońynda 40 myń ýntsııaǵa artyp, 74,06 mıllıon ýntsııaǵa jetti. Sarapshylar bul úrdis jalǵasyn tabady dep kútedi. Óıtkeni Beıjiń AQSh dollaryna degen senimniń tómendeýi jaǵdaıynda óziniń halyqaralyq aktıvteriniń qurylymyn ońtaılandyrýǵa tyrysady.
Bul ósim álemdik altyn baǵasynyń kóterilýimen tuspa-tus keldi. Ol FRJ stavkalaryn odan ári tómendetýdi kútýmen jáne onyń saıası táýelsizdigine kúmándanýdan týyndady. AQSh federaldy úkimetiniń jabylýy qaýipsiz baspanaǵa qyzyǵýshylyqty arttyrdy jáne COMEX altyn fıýchersteriniń baǵasynyń bir ýntsııa úshin 4 000,1 dollarǵa deıin ósýine ákeldi.
Golden Credit Rating International kompanııasynyń bas makroekonomıkalyq taldaýshysy Van Tsın Qytaı altyn qoryn ulǵaıtýdy jalǵastyrady dep boljaıdy. Onyń aıtýynsha, altyn qorynyń 7,7 paıyzyn qurasa, álemdik ortasha kórsetkish 15 paıyzdy quraıdy.
Sarapshy altyn aktıvteriniń ósýi ıýannyń halyqaralyq bedelin nyǵaıta túsetinin, al Qytaıdyń úlken valıýtalyq qory onyń baǵamynyń turaqtylyǵyna senimdi qoldaý kórsetetinin jetkizdi.
Eske sala keteıik, buǵan deıin Qytaı kompanııalarynyń jahandyq jasandy ıntellekt naryǵyndaǵy úlesi 15%-ǵa jetkenin jazǵanbyz.