Qytaıdyń valıýta qory 3,21 trıllıon dollarǵa deıin ósti

ASTANA.KAZINFORM - Buǵan Qytaıdyń Memlekettik valıýta basqarmasy (SAFE) jarııalaǵan málimetter dálel, dep habarlaıdy Kazinform tilshisi.

2025 jyldyń qańtar aıynyń sońyndaǵy jaǵdaı boıynsha Qytaıdyń valıýtalyq qory 2024 jyldyń jeltoqsan aıynyń sońyndaǵy kórsetkishpen salystyrǵanda 6,7 mıllıard dollarǵa nemese 0,21%-ǵa artyp, 3,209 trln dollar boldy.

- AQSh dollarynyń ındeksi ótken aıda tómendedi. Al álemdik qarjy aktıvteriniń baǵasy jetekshi ekonomıkalardyń makroekonomıkalyq derekteri men aqsha-nesıe saıasatynyń áserinen ósti, - delingen Qytaı retteýshisiniń málimdemesinde.

Málimdemede sondaı-aq qańtarda valıýta qorynyń ulǵaıýy valıýta baǵamyn aýystyrý men aktıv baǵasynyń ózgerýi áserinen bolǵany aıtylǵan.

- Qytaı ekonomıkasy turaqty jumys isteý jáne jaqsartý tendentsııasyn saqtaýda, bul eldiń valıýtalyq rezervteriniń turaqty kólemin qamtamasyz etedi, - dep atap ótti Qytaı Halyq Respýblıkasynyń Memlekettik valıýta komıteti.

Qytaıdyń altyn qory 73,45 mıllıon ýntsııaǵa deıin ósti.

Qytaı «Bir beldeý, bir jol» bastamasyna Panamanyń qatysýdan bas tartýyna jaýap bergenin jazǵan bolatynbyz.