Qytaıdyń Ulttyq oıyndarynda etnıkalyq qazaq bokstan altyn aldy

ASTANA. KAZINFORM — Shenchjen qalasynda ótip jatqan XV búkilqytaılyq spartakıadada bokstan erler arasyndaǵy 92 keliden joǵary salmaq dárejesiniń fınalynda Gýandýn provıntsııasynyń atynan dodaǵa túsken qazaq sportshysy Baıqonys Danabek chempıon atandy, dep habarlaıdy Sınhýa agenttigi.

Belgili bolǵandaı, Baıqonys aqtyq synda Qytaı Qoǵamdyq qaýipsizdik salasy boıynsha sport qaýymdastyǵynyń ókili Ma Tszınıandy aıqyn basymdyqpen jeńdi.

Altyn medaldy tókken ter, etken eńbektiń nátıjesi dep ataǵan Baıqonystyń aıtýynsha, fınaldaǵy qarsylasy burynnan judyryq túıistirip júrgen syralǵy básekeles eken. Sondyqtan bapkeri qarsylastyń tásilderin muqııat taldap, tııanaqty strategııa túzgen, bul aıqyn jeńistiń kilti bolǵan.

Búkilqytaılyq spartakıadanyń chempıony atanǵan ol endigi maqsatyn «Olımpıada úshin kúres» dep túıindedi.

Ashyq derekkóz boıynsha, Baıqonys Danabek 1997 jyly Shynjań ólkesinde ómir esigin ashqan. 2023 jyly búkilqytaılyq boks chempıonatynda 92 keli salmaq dárejesinde altyn alǵan, Hanchjoý Azııa oıyndarynda Qytaı quramasynyń sapynda óner kórsetken.

Buǵan deıin Qytaıdyń Úrimji qalasynda turatyn qytaıtildi qazaq jazýshysy Anar Zınýarbekqyzynyń Bın Sın atyndaǵy memlekettik ádebı syılyqtyń ıegeri atanǵany jaıly jazyp edik.