Qytaıdyń ulttyq brendine aınalǵan Іle jylqysymen kókpar jarysy ótti

ASTANA. KAZINFORM — Qytaıdyń Úrimji ekonomıkalyq-tehnologııalyq damý aımaǵy Shıhý kóshesindegi ıppodromda Shyńjań jylqy qaýymdastyǵynyń eki kúndik «Týnchýan kýbogy» atyndaǵy Іle jylqysynyń kókpar synaǵy serııasy boıynsha «Tıanshan shabandozdary» kýbogynyń kókpar jarysy ótti, dep habarlaıdy Qytaıdyń «Halyq gazeti».

Atalǵan BAQ-tyń deregine súıensek, Shyńjańda ósirilip, damytylǵan Іle jylqysy Qytaıda ulttyq brendke aınalǵan jylqy tuqymy sanalady.

Sol tanymal Іle jylqysynyń kókparǵa beıimdilik synaǵy boıynsha jarys ótken. 

«Kókpar jarysy — qazaq, uıǵyr, qyrǵyz, tájik, mońǵol jáne basqa da etnostar jaqsy kóretin dástúrli sport túri. Іle jylqysy Shyńjańda ósirilip, damytylǵan negizgi jylqy tuqymdarynyń biri bolǵandyqtan, Qytaıda brend jylqy tuqymyna aınaldy», — dep jazady People.cn.

Eske salsaq, buǵan deıin elordada báıge men kókpar jarystary ótip jatqany habarlandy.