Qytaıdyń týrısteri Túrkııaǵa vızasyz kire alady
ASTANA. KAZINFORM — Túrkııa turaqty tólqujaty bar, týrıstik jáne tranzıttik maqsatta keletin Qytaı azamattary úshin elge vızasyz kirý rejımin engizdi. Bul týraly Túrkııa prezıdenti Rejep Taıyp Erdoǵannyń jarlyǵynda aıtyldy, dep habarlaıdy Sınhýa.
Jańa erejelerge sáıkes, qytaılyq saıahatshylar kez kelgen 180 kúndik merzim ishinde 90 kúnge deıin vızalyq talaptardan bosatylady. Bul rejım 2026 jyldyń 2 qańtarynan bastap kúshine enedi.
Jańa qadam eki el arasyndaǵy saýda men týrızmdi nyǵaıtýǵa baǵyttalǵan. Vızadan bas tartý Túrkııanyń eń jyldam damyp kele jatqan týrıstik naryqtarynyń birine aınalǵan Qytaıdan kelýshilerdiń sany aıtarlyqtaı artýyna baılanysty boldy.
Túrkııanyń resmı derekterine súıensek, 2024 jyly elge kelgen qytaılyq týrıst sany bir jyl ishinde 65,1% artyp, shamamen 410 myńǵa jetti. Buǵan áýe qatynasynyń jaqsarýy jáne eldiń mádenı mura nysandaryna degen qyzyǵýshylyqtyń artýy sebep boldy.
Eske salaıyq, osyǵan deıin Armenııa men Túrkııa dıplomatııalyq pasport ıelerinen vızalyq alymdy alyp tastaıtyny týraly jazǵan bolatynbyz.