Qytaıdyń Tıbet aımaǵynda balyqtyń jańa túri tabyldy

ASTANA. KAZINFORM – Qytaıdyń Tıbet jotasynda ıhtıologtar balyqtyń taý jaıyny tuqymdasyna jatatyn jańa túrin anyqtap, oǵan Glaridoglanis verruciloba degen resmı ataý berdi.

Sınhýa agenttiginiń jazýynsha, jańa túr Tıbet ústirttik bıologııa ınstıtýty men Tıbet jaratylystaný murajaıynyń bas bolýymen eldegi birqatar JOO men ǵylymı-zertteý ortalyqtarynyń mamandarynan quralǵan birlesken ekspedıtsııanyń zertteý jumysy kezinde tabylǵan. Al zertteý jumysy Tıbettiń Lınchjı qalasynyń Dzaıý ýezi aýmaǵynda júrgizilgen.

Ǵalymdardyń málimetinshe, qazirgi kúnde taý jaıyny tuqymdasynyń verruciloba týysynyń úsh túri ǵana ǵylymǵa belgili bolyp otyr, sonyń biri – Glaridoglanis verruciloba. Bul túrdiń taralý aımaǵy, qazirgi málimetter boıynsha, Gımalaıdyń ońtústik-shyǵys qaptalyndaǵy Dzaıý ózeniniń alabymen ǵana shektelgen.

Mamandar bul jańalyq Gımalaı aımaǵyndaǵy bıologııalyq ártúrlilikti jete zertteý jáne aımaqtyń ereksheligine saı keletin qorǵaý sharalaryn ázirleý turǵysynan asa mańyzdy ǵylymı mánge ıe ekenin aıtyp otyr. Sonymen qatar atalǵan jańalyq Gımalaı aımaǵyndaǵy balyqtardyń júıeli evolıýtsııasyn anyqtaýǵa baǵyttalǵan bolashaq zertteýlerge mańyzdy derekkóz bolmaq.

Buǵan deıin Tıbet jotasyndaǵy ıArlýng Tsangpo (Brahmapýtra) ózeniniń tómengi aǵysynda álemdegi eń úlken sý elektr stantsııasynyń qurylysy bastalǵany týraly habarlaǵan edik.