Qytaıdyń tanymal blogeri Qazaqstan týrızmniń elshisi atandy
ASTANA. KAZINFORM — Kazakh Tourism Qytaıdyń tanymal ınflıýenseri Taotaoǵa «Qazaqstan týrızminiń elshisi» mártebesin tabys etti. Bloger óziniń 7 mıllıondyq aýdıtorııasyna elimizdiń baı mádenıeti men tabıǵatyn tanystyryp keledi.
Qytaılyq ınflıýenser Qazaqstannyń 3 óńirimen tanysyp úlgerdi. Ol alǵash ret elimizge 2024 jyly Dúnıejúzilik kóshpendiler oıyndarynda kelgen. Bul joly Taotao Shyǵys Qazaqstan jáne Almaty oblystarynyń biregeı tabıǵı jerlerin, Astana men Almatynyń aınalasyn aralap júr.
Taotao atqa minýge erekshe qyzyǵady jáne elimizdiń mádenıeti men tabıǵatyna basa kóńil bóledi. Bloger óz jazbalarynda qazaqtyń dástúrli kıimderi men ulttyq ashanasyn, búrkitpen ań aýlaý tárizdi biregeı sátterin kórsetedi.
— Mundaı qurmetti mártebeniń berilgenine asa qýanyp, rızashylyǵymdy bildiremin. Barynsha kóp adam Qazaqstan jaıly bilsin jáne kelsin degen nıetpen ásem tabıǵattaryńyz ben ulttyq taǵamdaryńyzdy kórsetýdi jalǵastyramyn, — deıdi Taotao.
Kazakh Tourism 2018 jyldan beri «QR týrızminiń elshisi» bastamasyn júzege asyryp keledi. Bul Qazaqstandy tartymdy týrıstik baǵyt retinde ilgeriletýge, álemniń túkpir-túkpirindegi saıahatshylar nazaryn elimizdiń tabıǵı jáne mádenı baılyǵynyń alýan túrliligine aýdarýǵa baǵyttalǵan. Ótken jyly qurmetti mıssııany japondyq bloger ıÝdjı Natsýma qabyldaǵan edi.
— Týrızm elshileri ınstıtýty — ulttyq týrıstik brendti shetelde ilgeriletýdiń mańyzdy quraly. Olardyń arasynda týrıstik ındýstrııanyń, mádenıet jáne bilim berý, medıa tsıfrlyq keńistik ókilderi bar. Qazaqstan týrızminiń elshileri álemniń birqatar memleketinde bar. Olar ózderiniń úlken yqylasymen jáne aqysyz negizde elimizdi kópshilikke tanytyp keledi, — dedi «Kazakh Tourism» UK» AQ Basqarma tóraǵasy Qaırat Sádýaqasov.
Aıta keteıik, búgin elordada «Tatý kórshi jáne dostyq: bolashaqqa qadam Qytaı-Ortalyq Azııa gýmanıtarlyq almasý» forýmy ótti.
Qytaı men Ortalyq Azııa elderi arasynda kontent jasaý, tehnologııalarmen almasý jáne mádenı baǵyttaǵy birlesken jumys aıryqsha ózekti bola túsken.