Qytaıdyń taǵy eki qalasyna Qazaqstannan tikeleı ushýǵa bolady
ASTANA. KAZINFORM — Qazaqstan men Qytaı áýe qatynasyn odan ári keńeıtý týraly ýaǵdalasty. Sonyń arqasynda eki el arasynda jańa áýe baǵyttary paıda bolady, dep habarlaıdy Kólik mınıstrliginiń baspasóz qyzmeti.
Tashkent qalasynda ótip jatqan «Qytaı — Ortalyq Azııa» (C5+1) azamattyq avıatsııa salasyndaǵy yntymaqtastyq jónindegi jumys toby konferentsııasy aıasynda bıylǵy jyldyń 4 qarashasynda Qazaqstan Respýblıkasy men Qytaı Halyq Respýblıkasynyń avıatsııalyq bılik organdary arasynda ekijaqty kelissózder ótti.
Qazaqstan delegatsııasyn QR Kólik mınıstrligi Azamattyq avıatsııa komıtetiniń tóraǵasy Saltanat Tompıeva basqardy. Qytaı tarapynan kelissózderge Qytaı Azamattyq avıatsııa ákimshiligi (CAAC) bas dırektorynyń orynbasary Baı Venlı qatysty.
Kelissózder barysynda taraptar Qazaqstan men Qytaı arasyndaǵy halyqaralyq áýe qatynasyn odan ári keńeıtý perspektıvalaryn, onyń ishinde turaqty reıster sanyn arttyrý jáne ushý baǵyttarynyń geografııasyn keńeıtý máselelerin talqylady.
— Kezdesý qorytyndysy boıynsha aptasyna ruqsat etilgen áýe reısteriniń sanyn 150-den 180-ge deıin arttyrý, sondaı-aq marshrýttyq jelige Qytaıdyń taǵy eki qalasy — Chendý men Qashǵardy qosý týraly ýaǵdalastyqqa qol jetkizildi. Qol jetkizilgen kelisimderdi iske asyrý eki eldiń áýe kompanııalary úshin jańa múmkindikter ashýǵa, tikeleı áýe reısteriniń qoljetimdiligin arttyrýǵa, jolaýshylarǵa qolaıly jaǵdaı jasaýǵa jáne tranzıttik tasymal múmkindikterin keńeıtýge múmkindik beredi, — delingen habarlamada.
Taraptar ekijaqty yntymaqtastyqty odan ári nyǵaıtýǵa jáne eki el arasyndaǵy áýe qatynasyn júıeli túrde damytýǵa múddeli ekendikterin rastady.
Qazaqstan men Qytaı azamattyq avıatsııa salasyndaǵy yntymaqtastyqty júıeli túrde damytyp keledi. Jolaýshylar aǵynynyń artýy, sondaı-aq iskerlik jáne týrıstik baılanystardyń jandanýy eki el arasyndaǵy tikeleı áýe qatynasyn odan ári keńeıtýge jańa múmkindikter ashyp otyr.
Buǵan deıin Astana men Qulja arasynda tikeleı áýe reısi ashylatynyn jazǵanbyz.
