Qytaıdyń soltústik-shyǵysyndaǵy sý tasqyny saldarynan 28 myń adam evakýatsııalandy

ASTANA. KAZINFORM — Qytaıdyń soltústik-shyǵysyndaǵy Lıaonın provıntsııasynyń 28 myńnan astam turǵyny qatty jańbyrdan týyndaǵan sý tasqyny saldarynan evakýatsııalandy, dep jazady Sınhýa agenttigi.

Provıntsııanyń sý tasqyny men qurǵaqshylyqqa qarsy kúres shtaby osy provıntsııanyń kóptegen aýdandarynda jeksenbi kúni saǵat 07:00-den dúısenbi kúngi 07:00-ge deıin qatty jańbyr jaýǵanyn habarlady. Provıntsııadaǵy jaýyn-shashynnyń ortasha táýliktik mólsheri 25,4 mm-ge jetti. Jaýyn-shashynnyń maksımaldy mólsheri saǵatyna 81,9 mm jetti. Osyǵan baılanysty provıntsııanyń alty ózenindegi sý deńgeıi qaýipti deńgeıden asyp tústi.

Provıntsııanyń ákimshilik ortalyǵy Shenıan qalasynda jáne osy provıntsııanyń aýdandyq mańyzy bar taǵy jeti qalasynda nóserge baılanysty úshinshi nemese tórtinshi deńgeıli tótenshe jaǵdaıǵa shuǵyl den qoıý tetikteri iske qosyldy.

Qytaıda sý tasqynyna baılanysty tótenshe jaǵdaılarǵa shuǵyl áreket etýdiń tórt deńgeıli júıesi qabyldandy, mundaǵy 1-deńgeı eń joǵary dep sanalady.

Provıntsııanyń sý basqarmasy bógetter jaǵdaıyn baqylaý jumystaryn kúsheıtti.

Sınoptıkter málimetinshe, seısenbi jáne sársenbi kúnderi provıntsııada taǵy da jańbyr jaýady.