Qytaıdyń iskerlik toptary AQSh-tyń kedendik baj salyǵyn kóterýine qarsy
ASTANA. KAZINFORM – Bul týraly jeksenbi kúni Qytaıdyń halyqaralyq saýdany damytýǵa járdemdesý jónindegi keńesiniń resmı ókili málimdedi, dep habarlaıdy Sınhýa aqparat agenttigi.
Komıtet ókiliniń málimdemesinde aıtylǵandaı, qytaılyq iskerlik ortalarynyń basshylary AQSh-tyń Qytaıdan ákelinetin taýarlarǵa qosymsha 10 paıyzdyq baj salyǵyn engizý sheshimine úzildi-kesildi qarsy.
Onyń aıtýynsha, Qurama Shtattardyń birjaqty qosymsha baj salyǵyn engizýi Dúnıejúzilik saýda uıymynyń (DSU) erejelerin óreskel buzady. Bul úshin kóptegen amerıkalyq bıznes pen tutynýshylar tóleýge májbúr bolady.
Bul qadam Qytaı men AQSh arasyndaǵy qalypty saýda-ekonomıkalyq yntymaqtastyqqa nuqsan keltiredi. Sondaı-aq jahandyq óndiristik-ótkizý tizbeginiń turaqtylyǵyna qaýip tóndiredi, dep qosty ol.
- Saýda jáne tarıftik soǵystarda jeńimpazdar joq, - dep atap ótti resmı ókil.
Ol AQSh-tyń qate áreketteri onyń ishki máselelerin sheshpeıtinin, kerisinshe qytaı-amerıkan qarym-qatynasyna nuqsan keltirip, jahandyq ekonomıkalyq damýǵa keri áserin tıgizetinin qosyp ótti.
Komıtet ókiliniń aıtýynsha, Qytaı iskerlik ortalary AQSh tarapyn óziniń qate ádisterin dereý túzetip, Qytaıǵa qarama-qarsy baǵytta júrip, eki eldiń jáne búkil álemniń iskerlik toptarynyń ózara paıdasy úshin álemdik ekonomıkaǵa turaqtylyq pen oń energııa ákelý úshin basqa eldermen yntymaqtastyqty nyǵaıtýǵa shaqyrady.
Eske sala ketsek, 17 qańtar kúni Qytaı tóraǵasy Sı Tszınpın AQSh-tyń jańadan saılanǵan prezıdenti Donald Tramppen telefon arqyly sóılesti.
Qytaı men AQSh eki eldiń jáne álemniń ıgiligi úshin seriktes ári dos bola alady. Bul týraly Qytaı tóraǵasy Sı Tszınpın AQSh-tyń jańadan saılanǵan prezıdenti Donald Tramppen telefon arqyly sóılesken kezde aıtty.