Qytaıdyń synaqtaǵy ǵarysh kemesi orbıtalyq stantsııany jabdyqtaýǵa jol ashady
ASTANA. KAZINFORM — Jaqynda ǵaryshqa ushyrylǵan «Tsınchjoý» synaq júk ǵarysh apparatynyń sońynan Qytaıdyń orbıtalyq stantsııasymen túıisip, júk jetkizýdi qamtamasyz etetin tolyqqandy nusqasy iske qosylady. Bul týraly Qytaı ǵylym akademııasynyń mıkrospýtnıkter salasyndaǵy ınnovatsııalar akademııasy habarlady, dep jazdy Sınhýa.
Synaq apparaty dúısenbi kúni Qytaıdyń soltústik-batysyndaǵy kommertsııalyq ǵarysh ınnovatsııalary pılottyq aımaǵynan Lijian-2 Y1 zymyran-tasyǵyshynyń kómegimen ushyrylyp, belgilengen orbıtaǵa sátti shyǵaryldy.
Atalǵan apparatty ázirlegen Qytaı ǵylym akademııasynyń mıkrospýtnıkter salasyndaǵy ınnovatsııalar akademııasynyń málimetine súıensek, synaq kemesiniń salmaǵy 4,2 tonnany quraıdy. Ol zymyran-tasyǵyshtardyń ártúrli túrlerimen úılesimdi jáne ushyrýǵa ońaı beıimdeledi.
Synaq ushýy barysynda «Tsınchjoý» bortynda tehnologııalyq múmkindikterdi pysyqtaý, orbıtada tekserý jáne ǵylymı zertteýlerdi qamtıtyn 27 joba júzege asyrylady. Jalpy paıdaly júk kólemi 1,02 tonnaǵa teń. Zertteýler 200-den 600 shaqyrymǵa deıingi bıiktikte júrgiziledi.
Synaq ǵarysh kemesi negizgi germetıkalyq bólikten jáne germetıkalyq emes artqy bólikten turady. Negizgi bóliktiń ishinde jalpy kólemi 27 tekshe metrdi quraıtyn 40 júk uıashyǵy ornalasqan. Onda ǵaryshkerlerge qajetti kúndelikti zattar, ǵylymı tájirıbelerge arnalǵan jabdyqtar jáne zertteý júkteri tasymaldanady.
«Tsınchjoýdyń» basty erekshelikteriniń biri — kólemi 300 lıtr bolatyn tońazytqysh júıesiniń ornatylýy. Ol árqaısysy 60 lıtrden turatyn bes salqyndatqysh kameradan quralǵan. Bul júıe ǵaryshkerlerge qajetti kúndelikti zattardy, sondaı-aq tómen temperatýrada saqtalýy tıis bıologııalyq tájirıbe úlgilerin saqtaýǵa múmkindik beredi.
Al germetıkalyq emes artqy bólik basqa júkterdi, qosymsha paıdaly júkti jáne ǵarysh keńistiginde tájirıbe júrgizýge qajet jabdyqtardy ornalastyrýǵa arnalǵan. Bul óz kezeginde «Tsınchjoý» kemesiniń júk kóterý múmkindigin barynsha tıimdi paıdalanýǵa jol ashady.
Aıta keteıik, Qytaı ǵaryshta aýrýhana salý úshin orbıtaǵa medıtsınalyq jabdyqtar jiberdi.
Al AQSh-tyń NASA ǵarysh agenttigi Orion ǵarysh kemesin Aıǵa ushyrdy.
