Qytaıdyń ShYU elderine óz naryǵyn keńirek ashý nıetin quptaımyz – Memleket basshysy
ASTANA. KAZINFORM – Prezıdent Qasym-Jomart Toqaev Shanhaı Yntymaqtastyq Uıymynyń sammıti aıasynda ótip jatqan «ShYU+» kezdesýinde Azııanyń damýynda ShYU-nyń róli artqanyn aıtty.
«Taǵy bir basym baǵyt – saýda-ekonomıkalyq baılanystardy kúsheıtý. Sanktsııalyq qaqtyǵystar álem ekonomıkasyna eleýli zardap tıgizip, keleshek damýdyń kókjıegin shektep jatyr. Mundaı jaǵdaıda bizge ózara saýda-ekonomıkalyq is-qımyldyń áldeqaıda ıkemdi, jaǵymdy dınamıka men áleýetti arttyrýǵa baǵyttalǵan strategııasyn jolǵa qoıý kerek», - dedi Prezıdent.
Qasym-Jomart Toqaev Azııa qurlyǵynyń qazirgi damýy kóp jaǵdaıda ShYU-nyń jumysymen baılanysty ekenin aıtty.
«ShYU elderiniń jahandyq jalpy ishki ónimdegi úlesi 30%-ǵa jetip otyr. Uıymdaǵy elderdiń syrtqy saýda kólemi 8 trln dollardan asyp otyr. Bul búkil álemdegi saýdanyń tórtten bir bóligine teń. Azııadaǵy jańa tarıhı ekonomıkalyq ósim kóp jaǵdaıda ShYU arqasynda bolyp jatqanyn, búkil jahandaǵy ekonomıkany turaqtandyrýshy faktor bolyp otyrǵanyn aıtqym keledi. Qazaqstan Qytaıdyń ShYU elderine óziniń aýqymdy naryǵyna keńirek jol ashyp, taýar aınalymyn 3 trln dollarǵa deıin jetkizý nıetin quptaıdy», - dedi Memleket basshysy.
