Qytaıdyń Saýda mınıstrligi TikTok áleýmettik jelisi boıynsha óz ustanymyn túsindirdi

ASTANA.KAZINFORM - Naqty kommertsııalyq kelisimderdi Qytaı úkimeti zańǵa sáıkes bekitýi kerek, dep habarlaıdy Kazinform tilshisi. 

Habarlamada Qytaı úkimeti árdaıym kásiporyndardyń zańdy quqyqtary men múddelerin qurmettep, qorǵap otyratyny, naryqqa baǵyttalǵan, zań ústemdigi men ınternatsıonaldandyrýǵa negizdelgen birinshi dárejeli iskerlik orta qalyptastyratyny, sondaı-aq naryqtyq ekonomıkanyń zańdaryn elemeıtin, kúshpen tartyp alatyn jáne kásiporyndardyń zańdy quqyqtary men múddelerine nuqsan keltiretin tájirıbelerge qarsy ekeni qaıta málimdelgeni aıtylǵan.

— Qytaı kásiporyndar arasyndaǵy teń, erikti jáne ádil bıznes tájirıbesin qurmetteıdi. Arnaıy kommertsııalyq kelisimder Qytaı zańnamasyna, sonyń ishinde tehnologııa eksportyna sáıkes bolýy kerek jáne Qytaı úkimeti zańǵa sáıkes maquldanýy kerek, — delingen habarlamada.

Buǵan deıin AQSh prezıdenti Donald Tramp TikTok áleýmettik jelisiniń AQSh-taǵy jumysyn taǵy 75 kúnge uzartý týraly jarlyqqa qol qoıǵan bolatyn.

Aıta ketelik AQSh-tyń TikTok-ty satyp alý jónindegi kelisimi toqtatyldy.