Qytaıdyń iri logıstıkalyq habynda QazTrade ókildigi iske qosyldy
ASTANA. KAZINFORM – Qytaıdyń Ýhan qalasynda QazTrade ulttyq saýda kompanııasynyń ókildigi ashyldy.
Ýhan qalasy Qytaıdaǵy negizgi kólik-logıstıkalyq toraptardyń biri sanalady jáne «toǵyz provıntsııanyń toǵysqan jeri» retinde belgili. Jańa ókildik Qazaqstannyń eksporttyq áleýetin arttyrýǵa jáne qytaı naryǵyndaǵy saýda baılanystaryn keńeıtýge baǵyttalǵan.
Qazirgi ýaqytta QazTrade-tiń seriktes keńseleri Hefeı, Sıan, Chansha, Nankın, Tıantszın, Chendý jáne Tsındao qalalarynda jumys isteıdi. Ýhandaǵy jańa keńse Qytaıdaǵy kompanııa qyzmetiniń taǵy bir mańyzdy tirek núktesine aınalady dep kútilýde.
«Qazir biz jumysty bıznes tek kelissózge kelip ketpeı, Qytaı naryǵynda turaqty jumys isteı alatyndaı etip quryp jatyrmyz. Ol úshin Qytaı boıynsha osyndaı keńseler jelisi qajet. Biz kompanııalardy tek súıemeldep qoımaı, qytaılyq seriktestermen tikeleı, sol jerde jumys isteýge múmkindik beremiz. Ýhan osy turǵyda mańyzdy núkte. Bul birneshe óńirdiń suranysy toǵysatyn iri logıstıkalyq hab», – dedi QazTrade bas dırektory Aıtmuhammed Aldajarov.
Sapar aıasynda QazTrade pen GuanYu International Supply Chain kompanııasy arasynda kelisimge qol qoıyldy. Qujat Ortalyq Qytaıda qazaqstandyq ónimderdi ilgeriletýdi, B2B kezdesýler uıymdastyrýdy, kelissózderdi súıemeldeýdi jáne jetkizilimderdi qoldaýdy kózdeıdi.
Іs-sharaǵa QazTrade basqarýshy dırektory Aınur Ámirbekova, Tszıansıa aýdany halyq úkimeti basshysynyń orynbasary Ne Kaıtıan, aýdannyń syrtqy ister basqarmasynyń dırektory Fý Tszıýn, kommertsııa basqarmasynyń basshysy Ge Tszenlaı, sondaı-aq ınvestıtsııalyq-tehnologııalyq toptyń basqarma tóraǵasy Han Veı jáne qytaılyq kompanııalardyń ókilderi qatysty.
QazTrade derekterine sáıkes, Ýhan qalasy ornalasqan Hýbeı provıntsııasymen taýar aınalymy 2025 jyly 163,6 mln AQSh dollaryn qurap, 12,1%-ǵa ósken.
Aıta keteıik, Qazaqstannan Qytaıǵa aqsha aýdarymdary rekordtyq mınımýmǵa deıin tómendedi.
