Qytaıdyń ozyq tehnologııalary Qazaqstannyń maı óńdeý ónerkásibine engiziledi
ASTANA.KAZINFORM – 26–30 shilde aralyǵynda Maıly Daqyldardy Óńdeýshilerdiń Ulttyq Qaýymdastyǵy (MDÓUQ) Qazaqstan delegatsııasynyń Qytaıdyń Henan provıntsııasy Hýasıan qalasynda ornalasqan Henan Huatai Cereals and Oilseeds Machinery Co (Huatai) kompanııasynyń óndiristik alańymen tanysty, dep habarlaıdy QR Saýda jáne ıntegratsııa mınıstrliginiń baspasóz qyzmeti.
Huatai – maı óńdeý salasyna arnalǵan jabdyqtardy óndiretin iri kásiporyndardyń biri. Sapar MDÓUQ pen Huatai arasynda jasalǵan yntymaqtastyq memorandým aıasynda ótti.
Delegatsııa quramyna MDÓUQ ókilderi, Qaýymdastyqqa múshe toǵyz maı óńdeý kásipornynyń ókilderi, Qazaqstannyń jetekshi ǵylymı uıymdary – S. Seıfýllın atyndaǵy Qazaq agrotehnıkalyq zertteý ýnıversıteti (QazATZÝ) jáne Qazaq qaıta óńdeý jáne taǵam ónerkásibi ǵylymı-zertteý ınstıtýtynyń (QazQÓTÓǴZI) mamandary kirdi.
Sapar barysynda qatysýshylar kásiporynnyń óndiristik qýattarymen, maı óńdeý salasyna arnalǵan jabdyqtarymen jáne maıly daqyldardy tereń óńdeýge arnalǵan zamanaýı tehnologııalarymen tanysty.
Sonymen qatar, qazaqstandyq kásiporyndardyń ókilderi Huatai basshylyǵymen perspektıvti ınvestıtsııalyq jobalardy iske asyrý boıynsha B2B formatyndaǵy kelissózder ótkizdi.
Sapardyń negizgi is-sharalarynyń biri – 28 shildede ótken astyq jáne maıly daqyldardy tereń óńdeýge arnalǵan ozyq tehnologııalar men ıntellektýaldy jabdyqtar jónindegi II Qazaqstan–Qytaı semınary boldy.
Semınardy Huatai kompanııasy Chinese Cereals and Oils Association uıymymen birlesip uıymdastyrdy. Іs-sharaǵa bıznes qaýymdastyǵynyń, ǵylymı ortanyń jáne jabdyq óndirýshilerdiń ókilderi qatysty. Ýhan polıtehnıkalyq ýnıversıteti men Henan tehnologııalyq ýnıversıtetiniń jetekshi professorlary sóz sóılep, óńdeý óndiristeriniń tıimdiligin arttyrýǵa baǵyttalǵan zamanaýı ǵylymı ázirlemeler men tehnologııalyq sheshimderdi tanystyrdy.
Semınar aıasynda QazQÓTÓǴZI men Huatai kompanııasy arasynda yntymaqtastyq týraly memorandýmǵa qol qoıyldy. Qujat ǵylymı-tehnıkalyq yntymaqtastyqty damytý, tájirıbe almasý, birlesken zertteýler júrgizý jáne óńdeý ónerkásibine jańa tehnologııalardy engizý jónindegi jobalardy iske asyrýdy kózdeıdi.
MDÓUQ-nyń málimetinshe, ekinshi birlesken semınardyń ótkizilýi maıly daqyldardy tereń óńdeý salasyndaǵy Qazaqstan men Qytaı arasyndaǵy áriptestikti nyǵaıtýdyń kezekti kezeńi boldy. Mundaı ózara is-qımyl zamanaýı tehnologııalardyń transferine, qoldanbaly ǵylymnyń damýyna, otandyq kásiporyndardyń tehnologııalyq deńgeıin arttyrýǵa jáne halyqaralyq óndiristik kooperatsııany keńeıtýge yqpal etedi.
Aıta keteıik, qazaqstandyq delegatsııanyń Huatai óndiristik alańyna alǵashqy sapary MDÓUQ tarapynan 2025 jyly uıymdastyrylǵan. Taraptar yntymaqtastyq týraly memorandýmǵa qol qoıyp, is-shara osy qujat aıasynda júzege asyp jatyr.
Osyǵan deıin Qazaqstan men Qytaı saýda-ekonomıkalyq yntymaqtastyqtyń jańa baǵdarlamasyn bekitken bolatyn.
