Qytaıdyń Ortalyq banki transshekaralyq operatsııalarda ıýan paıdalanýdy yntalandyrady
ASTANA. KAZINFORM - Qytaı Halyq banki (QHB, Ortalyq Bank) halyqaralyq saýda, ınvestıtsııalar jáne qarjylandyrý protsedýralaryn jeńildetý úshin transshekaralyq esep aıyrysý operatsııalarynda, baǵa belgileýde, ınvestıtsııalarda jáne qarjylandyrýda ıýan paıdalanýdy yntalandyrady.
Bul týraly beısenbide jarııalanǵan Qytaı Halyq banki málimdemesinde aıtylǵan, dep jazady Sınhýa.
Ortalyq bank ıýannyń offshorlyq naryǵyn damytýǵa, valıýtalyq svoptar men klırıngtik bankterdiń rólin arttyrýǵa nıetti ekenin málimdedi, sondaı-aq Shanhaı mártebesin qalyptastyrýdy jedeldetýge jáne Sıangannyń halyqaralyq qarjy ortalyqtary retindegi mártebesin sapaly nyǵaıtýǵa ýáde berdi.
17-18 aqpan aralyǵynda QHB ótkizgen konferentsııada 2024 jyldyń sońyna qaraı jahandyq tólemderdegi ıýan úlesi tórtinshi orynda, al álemdik saýdany qarjylandyrýdaǵy ıýan úlesi úshinshi orynda ekeni aıtyldy. Bul ıýan ınternatsıonalızatsııasynyń turaqty ósýin kórsetedi.
Konferentsııada 2025 jyly ortalyq banktiń makroprýdentsıaldy retteý men qarjylyq turaqtylyqty qamtamasyz etýdegi fýnktsııalaryn keńeıtý, makroprýdentsıaldy saıasat júıesin jetildirý, sondaı-aq tıisti jańa quraldardy engizýge kúsh jumsalatynyn málimdedi.
Sonymen qatar, QHB naryqtaǵy quldyraýdy toqtatý jáne sektordy turaqtandyrý úshin jyljymaıtyn múlik sektoryndaǵy qarjylyq basqarýdy jaqsartýǵa ýáde berdi.
Qytaı osyǵan deıin 2025 jyly sheteldik ınvestıtsııalardy turaqtandyrý boıynsha is-qımyl josparyn jarııalady.