Óskemende klýbqa «bomba qoıǵan» 28 jastaǵy jigit ustaldy

ÓSKEMEN. KAZINFORM – Óskemen qalasynda klýbqa bomba qoıylǵany jaıly jalǵan aqparat taratqan er adamǵa qylmystyq is qozǵaldy.

ShQO polıtsııa departamentiniń málimetine súıensek, 13 qańtarda tańǵa jýyq mas kúıde bolǵan er adam «102» arnasyna qońyraý shalǵan. Óz sózinde ol qaladaǵy klýbtardyń birinde bomba qoıylǵanyn jetkizdi. 

- Oqıǵa ornyna birden polıtsııanyń syrtqy jasaǵy men jedel tergeý toby jiberilgen. Alaıda klýb ǵımaratyn muqııat tekserý barysynda eshqandaı da jarylǵysh zat tabylmady. Polıtsııa qyzmetkerleri 28 jastaǵy er adamdy ustady. Anyqtalǵandaı, ol sol klýbqa turaqty túrde kelip júrgen, - delingen aqparatta. 

Kúdikti óz áreketin mas kúıde jasaǵanyn jáne bolǵan jaıt múlde esinde joqtyǵyn aıtqan.

 - Qazirgi ýaqytta terrorızm aktisi týraly kórineý jalǵan habarlaý faktisi boıynsha qylmystyq is qozǵaldy. Er adam qolhatpen bosatyldy. Tergeý jalǵasýda, - delingen habarlamada.

Eske salsaq, osyǵan deıin ShQO-da kórshisinen ósh almaq bolǵan er adam shatasyp basqa bireýdiń qorasyn órtep jibergenin habarlaǵan edik.