Qytaıdyń Ortalyq Azııa elderimen taýar aınalymynyń jartysy Qazaqstanǵa tıesili
ALMATY. KAZINFORM — Almatyda syrtqy ister mınıstrleriniń «Ortalyq Azııa — Qytaı» formatyndaǵy VI kezdesýi bastaldy.
Resmı bólim bastalmas buryn delegatsııa basshylaryn — QR Premer-mınıstriniń orynbasary — Syrtqy ister mınıstri Murat Nurtileý quttyqtady.
Odan keıin qatysýshylar óńirlik jáne halyqaralyq yntymaqtastyqtyń ózekti máselelerin talqylaýǵa kóshti.
Qazaqstan dıplomatııasynyń basshysy óz sózinde negizgi ınvestıtsııalyq seriktes Qytaımen tolyq aýqymdy yntymaqtastyq Qazaqstan úshin de, Ortalyq Azııa elderi úshin de basty basymdyq bolyp qala beretinin atap ótti.
— Qytaı — bizdiń strategııalyq áriptesimiz, onymen ózara is-qımyl ýaqyt synynan ótken jáne syrtqy jaǵdaılarǵa baǵynbaıtyn ózara senimniń berik negizine qurylǵan. Ortalyq Azııa memleketteriniń áleýetin QHR-dyń orasan zor múmkindikterimen biriktirý teńdesi joq óńirlik arenada ózara múddeler men berik seriktestiktiń qalyptasýyna jol ashady, — dep atap ótti Murat Nurtileý.
Ol yntymaqtastyq tarıhyndaǵy mańyzdy oqıǵa 2023 jyly Sıan qalasynda ótken Ortalyq Azııa-Qytaı birinshi sammıti bolǵanyn, onda elder basshylary saýda, kólik, logıstıka, bilim, ǵylym jáne basqa da salalardaǵy yntymaqtastyqty damytýdyń naqty vektoryn anyqtaǵanyn eske saldy.
Tek 2024 jyldyń ózinde Ortalyq Azııa elderi men Qytaı arasyndaǵy taýar aınalymy rekordtyq 95 mlrd dollarǵa jetti, onyń 46 paıyzy Qazaqstanǵa tıesili.
— Astana oń dınamıkasyn saqtaýǵa, ózara senimdi nyǵaıtýǵa jáne Sıan qurýǵa jáne jańa tabystarǵa jetýge nıetti, — dep atap ótti mınıstr.
Qazaqstan osy jazda Astanada ótetin «Ortalyq Azııa — Qytaı» formatyndaǵy ekinshi sammıtti ótkizýge erekshe mán beredi.
Murat Nurtileý elimizde bul formattyń aımaqtyq ózara is-qımyl tetikteri arasynda flagman bolýy úshin barlyq jaǵdaı jasalyp jatqanyn jetkizdi.
Osyǵan deıin QR Premer-mınıstriniń orynbasary — Syrtqy ister mınıstri Murat Nurtileý jáne QKP OK saıası bıýrosynyń múshesi, Qytaı Halyq Respýblıkasynyń syrtqy ister mınıstri Van I Qazaqstan men Qytaı arasyndaǵy Strategııalyq dıalogtyń ekinshi otyrysyna qatysqan bolatyn.