Qytaıdyń Ortalyq Azııa elderimen saýdasynyń jartysy Qazaqstanǵa tıesili – Prezıdent
Qazaqstan Prezıdenti Qasym-Jomart Toqaev Beıjińge resmı sapary aıasynda Búkilqytaılyq halyq ókilderi jınalysy Turaqty komıtetiniń tóraǵasy Chjao Letszımen kezdesý ótkizdi. Kazinform bul týraly Aqordaǵa silteme jasap habarlaıdy.
Kezdesý barysynda Qasym-Jomart Toqaev ǵasyrlar boıǵy dostyq pen ózara qoldaýdyń berik arqaýyna súıene otyryp, Qazaqstan men Qytaı máńgilik ári jan-jaqty strategııalyq seriktestik rýhynda turaqty nyǵaıyp kele jatqan úlgili memleketaralyq yntymaqtastyqtyń negizin qalaǵanyn atap ótti.
«Eki el arasynda belsendi ári senimdi saıası dıalog ornaǵan. Úkimetter men parlamentter deńgeıinde júıeli jumys júrgizilip jatyr. Byltyr elderimiz arasyndaǵy yntymaqtastyqtyń jańa «altyn 30 jyldyǵyna» qadam bastyq. Búgin Tóraǵa Sı Tszınpınmen jáne Memlekettik keńestiń Premeri Lı Tsıanmen jan-jaqty kelissózder júrgizý barysynda ózara tıimdi yntymaqtastyqty kúsheıtýge nıetti ekenimizdi rastadyq. Qazirgi tańda Qytaıdy Qazaqstannyń eń basty saýda seriktesteriniń jáne bizdiń ekonomıkamyzdyń iri ınvestorlarynyń biri deýge bolady. Biz elderimiz arasyndaǵy taýar aınalymyn aldaǵy ýaqytta 40 mıllıard dollarǵa deıin jetkizýdi kózdep otyrmyz. Jalpy Qytaıdyń Ortalyq Azııa memleketterimen taýar aınalymynyń jartysy Qazaqstanǵa tıesili», – dedi Prezıdent.
Óz kezeginde Chjao Letszı Qasym-Jomart Toqaevqa iltıpat bildire otyryp, qazaq-qytaı qatynastarynyń qarqyndy damyp kele jatqanyn atap ótti. Onyń aıtýynsha, Qazaqstan Prezıdentiniń sapary barysynda Qytaı tarapymen tabysty kelissózder júrgizildi. Sonymen qatar Búkilqytaılyq halyq ókilderi jınalysy Turaqty komıtetiniń tóraǵasy eki el arasyndaǵy strategııalyq seriktestik odan ári bekıdi, ózara tıimdi yntymaqtastyq damıdy jáne ekijaqty qatynastar jańa deńgeıge kóteriledi dep senim bildirdi.
Qasym-Jomart Toqaev pen Chjao Letszı Qazaqstan men Qytaıdyń parlamentaralyq qatynasynyń josparly túrde nyǵaıýyn oń baǵalady, sondaı-aq keń kólemdegi ekijaqty yntymaqtastyqtyń tabysty damyp kele jatqanyn atap ótti.
Eske salaıyq, keshe Qasym-Jomart Toqaev Qytaı Halyq Respýblıkasyna resmı saparmen bardy.
Memleket basshysy QHR Tóraǵasy Sı Tszınpınmen kelissóz júrgizdi. Osy kelissóz nátıjesinde eki eldiń delegatsııa músheleri birqatar qujatqa qol qoıdy.
QR Prezıdenti Beıjińde Ábý Nasyr Ál-Farabıge qoıylǵan bıýstti saltanatty túrde ashty.
Keıin Q.Toqaev Beıjiń lıngvıstıkalyq ınstıtýtynda taǵylymdamadan ótken kezinde ózine dáris bergen professor Lıý Shıtsınmen áńgimelesip, SINOPEC kompanııasy dırektorlar keńesiniń tóraǵasy Ma ıÝnshendi qabyldady.
Odan ári Memleket basshysy YTO Express Co., Ltd kompanııasynyń basqarma tóraǵasy Iý Hýeı Dzıaony, CITIC Group kompanııasynyń basqarma tóraǵasy Chjý Hesındi qabyldady.
Al CRRC Sorporation Limited kompanııasynyń basqarma tóraǵasy ári atqarýshy dırektory Cýn ıÝntsaımen áńgime barysynda QTJ Qytaıdyń SRRC kompanııasymen quny 1,3 mlrd dollar bolatyn kelisimge qol qoıatyny belgili boldy.
Q.Toqaevtyń sapary sheńberinde 30 kelisimge qol qoıyldy.
QHR Memlekettik keńesiniń Premeri Lı Tsıanmen kezdesýde Memleket basshysy qazaq-qytaı qatynasy qarqyndy damyp jatqany týraly atap ótti.
