Qytaıdyń ońtústik-batysynda sý tasqynynan alty adam qaza tapty
ASTANA. KAZINFORM — Saǵat 11:00-degi jaǵdaı boıynsha Qytaıdyń ońtústik-batysyndaǵy Gýıchjoý provıntsııasynyń Jýntszıan ýezinde bolǵan kúshti sý tasqyny saldarynan alty adam opat boldy, dep jazady Sınhýa.
Bul týraly jergilikti sý tasqyndaryna qarsy shtabtyń baspasóz qyzmeti habarlady.
Seısenbi kúninen bastap Jýntszıan ýezin sońǵy 50 jyldaǵy eń kúshti sý tasqyny basyp qaldy. Birneshe ózenderdiń sý deńgeıi kúrt kóterildi. Sý aǵynynyń eń joǵary kórsetkishi sekýndyna 11 360 tekshe metrge jetti.
Provıntsııadaǵy tómengi aýdandardyń kóp bóligi sý astynda qalyp, birneshe aýyldyq okrýgter men eldi mekenderdiń ınfraqurylymyna úlken zııan keldi. Bul avtokólik qozǵalysyna kedergi jasap, baılanys qyzmetteriniń buzylýyna, turǵyndardyń qıyn jaǵdaıǵa tap bolýyna ákep soqty.
Qazirgi tańda ýezd ortalyǵyndaǵy sý deńgeıi qaýipti deńgeıden tómendedi. Sondaı-aq, tasqynǵa qarsy kúres aıasynda arnalardy tereńdetý men drenaj jumystaryn júrgizý, epıdemııalardyń aldyn alý maqsatynda zalalsyzdandyrý sharalaryn uıymdastyrý, apattan keıin qalpyna keltirý jáne qaıta qurý jumystary júrgizildi. Sonymen birge, sý tasqyny kezinde joǵalǵan adamdardy izdestirý jumystary uıymdastyryldy.
Eske salsaq, qatty jáne tolassyz jaýǵan jańbyr men ózenderdiń joǵarǵy aǵysynan kelgen sý kóleminiń artýy saldarynan Qytaıdyń ońtústik-batysyndaǵy Gýıchjoý provıntsııasynyń eki ýezinde kúshti sý tasqyny boldy. Seısenbi kúni saǵat 14:30–daǵy málimet boıynsha Jýntszıan jáne Tsýntszıan ýezderinde tıisinshe 48 900 jáne 32 000 adam ýaqytsha evakýatsııalandy.
Qytaı bıligi sý tasqynynan zardap shekken Gýıchjoý provıntsııasyna 100 mln ıýan bólgeni belgili boldy.
Eki kún buryn Gýıchjoý provıntsııasynda tasjol kópiri qulap, júk kóliginiń júrgizýshisi qıraǵan kópirde ilýli turǵan kólik kabınasynda qalyp qoıǵanyn habarlaǵan edik.