Qytaıdyń ońtústik-batysynda nóser jaýyn saldarynan 10 myńǵa jýyq adam evakýatsııalandy
ASTANA. KAZINFORM – Qytaıdyń Gýıchjoý provıntsııasynda tolassyz jaýǵan jańbyr sý tasqynyn týǵyzyp, 10 myńǵa jýyq turǵyn qaýipsiz jerge kóshirildi, dep habarlaıdy Sınhýa.
6-7 maýsym kúnderi jaýǵan nóserden Tsıansı qalalyq ýezi, Tszýnı qalalyq okrýgi jáne Chanshýn ýezi qatty zardap shekken.
Tsıansı qalalyq ýezinde senbiden jeksenbi tańyna deıin tolassyz jaýǵan jaýyn barlyq 30 aýyldyq okrýg pen kentti qamtyǵan. Onyń ishinde bes eldi mekende jaýyn-shashyn mólsheri asa joǵary deńgeıge jetken.
Jergilikti bılik táýlik boıy jumys isteıtin tótenshe jaǵdaı rejımine kóshti. Qazirgi ýaqytqa deıin qutqarýshylar 491 otbasynyń 1377 turǵynyn evakýatsııalap, oqshaýlanyp qalǵan 50-den astam adamdy qutqarǵan.
Chanshýn ýezinde Bantsýn sý qoımasyndaǵy elektr qýatynyń úzilýi saldarynan nysannyń jumysy buzylyp, sý deńgeıi shekti mejeden asyp ketken. Sonyń nátıjesinde tómengi aǵysta ornalasqan aýyldardan shamamen 1000 otbasynyń 3000-nan astam turǵyny qaýipsiz jerge kóshirildi.
Qytaıdyń Sý sharýashylyǵy mınıstrligi men Meteorologııalyq basqarmasy 7 maýsym saǵat 18:00-den bastap kenetten bolatyn sý tasqyndaryna baılanysty eń joǵary «qyzyl» deńgeıdegi eskertý jarııalady.
Vedomstvolar 7 maýsym saǵat 20:00-den 8 maýsym saǵat 20:00-ge deıin Gýıchjoý provıntsııasynyń ońtústik-shyǵys bóliginde tasqyn qaýpi óte joǵary ekenin málimdedi.
Tabıǵı apatqa qarsy sharalar aıasynda Tsıandýnnan-Mıao-Dýn avtonomııalyq okrýginde 27 ózenge baqylaý kúsheıtilip, myńdaǵan qyzmetker jumyldyryldy.
Jeksenbi keshindegi málimet boıynsha, atalǵan avtonomııalyq okrýgte 1322 otbasynyń 4582 turǵyny aldyn ala evakýatsııalanǵan. Qazirgi ýaqytta taǵy 7213 otbasynyń 21 754 turǵynyn kóshirý jumystary jalǵasyp jatyr.
Aıta keteıik, Grekııanyń Evbeıa aralynda magnıtýdasy 4,9 bolatyn jer silkinisi tirkeldi.
