Qytaıda bıyl ǵana paıdalanýǵa berilgen alyp kópir opyrylyp tústi

ASTANA. KAZINFORM — Osydan nebári birneshe aı buryn ǵana ashylǵan Qytaıdyń ońtústik-batysyndaǵy Hýntsı kópiriniń bir bóligi opyrylyp tústi, dep habarlaıdy VVS.

Qytaıdyń ońtústik-batysyndaǵy Sychýan provıntsııasynda ornalasqan Hýntsı kópiri ishinara qulap, aımaqta qoıý shań kóterildi. Bul kópir nebári birneshe aı buryn ǵana paıdalanýǵa berilgen edi. Ol Qytaıdyń ishki óńirin Tıbetpen jalǵaıtyn ulttyq avtojol boıynda ornalasqan.

Bıliktiń málimetinshe, kópir mańyndaǵy eńister men joldarda jaryqtar baıqalǵannan keıin ol dúısenbi kúni jabylǵan. Alaıda seısenbi tústen keıin taýly aýmaqta kóshkin júrip, sonyń saldarynan kópirdiń bir bóligi opyrylǵan.

Oqıǵa saldarynan zardap shekkender týraly aqparat joq.

Merdiger kompanııa Sichuan Road and Bridge Group habarlaýynsha, kópirdiń qurylysy osy jyldyń basynda aıaqtalǵan.

Reuters agenttiginiń habarlaýynsha, polıtsııa kópirdi qulardan bir kún buryn, dúısenbi tústen keıin kólik qozǵalysyn shektep, tolyq japqan. Bul sheshim kópir mańyndaǵy eńister men joldarda jaryqtar paıda bolǵannan keıin jáne oǵan jaqyn taýdyń topyraǵynyń yǵysý belgileri baıqalǵan soń qabyldanǵan.

Eske sala ketsek, Qytaıda álemdegi eń bıik kópir ashyldy.

Al Qazaqstandaǵy eń bıik kópirdiń qurylysy kelesi jyly aıaqtalady.