Qytaıdyń ońtústiginde myńdaǵan adam chıkýngýnıa vırýsyn juqtyrdy

ASTANA. KAZINFORM — Qytaıdyń ońtústigindegi Gýandýn provıntsııasynda bıyl chıkýngýnıa bezgegin juqtyrýdyń 7 myńnan astam jaǵdaıy tirkeldi. Bul týraly BBC habarlaıdy.

Aımaqtyń aýrýlardy baqylaý jáne aldyn alý ortalyǵy sońǵy eki aptada 5832 jańa jaǵdaı anyqtalǵanyn málimdedi. Qytaıda mundaı indet sırek kezdeskenimen, vırýstyń jyldam taralýy bılik tarapynan alańdaýshylyq týǵyzdy.

Foshan qalasynan bólek, provıntsııadaǵy taǵy keminde 12 qalada chıkýngýnıa deregi rastaldy. Sonymen qatar, 6 tamyzda kórshiles Gonkongta da úsh jańa jaǵdaı tirkeldi.

Gýandýn bıligi vırýstyń taralýyna qarsy bıologııalyq sharalardy qolǵa aldy. Olardyń qatarynda vırýsty taratatyn Aedes masalaryn joıatyn «pil masalaryn» tabıǵı ortaǵa jiberý, sondaı-aq masa dernásilderin jeıtin arnaıy balyq túrlerin sý qoımalaryna jiberý sekildi tásilder bar. Mysaly, ótken aptada Foshan qalasynda 5000-ǵa jýyq mundaı balyq sýǵa jiberilgen.

Halyqqa toqtap qalǵan sýdy qurǵatyp, sý ydystaryn tazalap otyrý, repellentter qoldaný jáne alǵashqy belgiler baıqalǵanda dereý dárigerge qaralý usynylady. Qazirgi tańda aýrýdyń barlyq jaǵdaıy jeńil túrde ótip jatyr, al naýqastardyń 95%-y bir apta ishinde saýyǵyp ketip jatyr.

Eýropalyq aýrýlardy baqylaý jáne aldyn alý ortalyǵynyń derekteri boıynsha, 2025 jyldyń basynan beri álemde 240 myńǵa jýyq adam chıkýngýnıa vırýsyn juqtyrǵan. Eýropa elderinde 31 jaǵdaı tirkelgen: 30-y Frantsııada, 1-eýi Italııada.

Eske sala keteıik, chıkýngýnıa bezgegi — Aedes masasy arqyly taralatyn jedel vırýstyq aýrý. Negizgi belgileri — joǵary temperatýra, bórtpe jáne býyn aýrýlary. Bul aýrýdyń belgileri denge bezgegine uqsas.

Buǵan deıin Qytaıdyń ońtústiginde Chıkýngýnıa bezgegine qatysty eskertý júıesi iske qosylǵany habarlandy.