Qytaıdyń ońtústiginde Chıkýngýnıa bezgegine qatysty eskertý júıesi iske qosyldy

ASTANA. KAZINFORM — Qytaıdyń ońtústigindegi Gýandýn provıntsııasynda, atap aıtqanda Gýanchjoý qalasynda Chıkýngýnıa vırýsyn juqtyrý qaýpi týraly habar beretin jańa fýnktsııa iske qosyldy.

Bul júıe paıdalanýshylardyń geolokatsııasy boıynsha eskertý jasap, juqpaly aýrýdyń taralýyna baılanysty qaýip deńgeıin kórsetedi, dep jazdy Global Times.

Resmı málimetterge sáıkes, sońǵy aptada provıntsııa aýmaǵynda Chıkýngýnıa bezgegimen 2892 jańa jaǵdaı tirkelgen. Aýyr ne ólim jaǵdaılary anyqtalǵan joq.

Aımaqtyq ınfektsııalyq aýrýlardy baqylaý ortalyǵynyń jetekshi sarapshysy Kan Mınniń aıtýynsha, provıntsııadaǵy epıdemıologııalyq ahýal birtindep turaqtalyp keledi. Alaıda syrttan vırýstyń ákeliný qaýpi jáne Aedes masalarynyń belsendiligin arttyratyn qolaısyz aýa raıy faktorlary saqtalýda.

Jańa onlaın-karta qoldanýshylarǵa óz aýdandaryndaǵy ınfektsııalyq ahýal týraly jedel aqparat usynady jáne qorǵaný sharalary boıynsha usynymdar beredi. Karta aýrýlardy baqylaý ortalyǵynyń resmı saıtynda jáne WeChat platformasyndaǵy resmı paraqshada qoljetimdi.

Karta eki modýlden turady: «qala boıynsha ahýal» jáne «monıtorıng núktelerindegi jaǵdaı». Paıdalanýshylar naqty bir aýdan boıynsha masalardyń taralý tyǵyzdyǵyn jáne vırýs qaýpin óz ornalasqan jeri arqyly teksere alady.

Aıta keteıik, Qytaılyq dárigerler qaterli isikke qarsy jańa em tapty.