Qytaıdyń ońtústiginde 3 myńnan astam adam chıkýngýnıa vırýsyn juqtyrǵan

ASTANA. KAZINFORM – Qytaıdyń ońtústigindegi Gýandýn provıntsııasynda ótken aptada Chıkýngýnıa bezgegin juqtyrýdyń 3181 jańa jaǵdaıy tirkeldi. Bılik indetke baılanysty jedel áreket etý sharalaryn jarııalady, dep habarlaıdy jergilikti BAQ.

Gýandýn provıntsııasynyń aýrýlardy baqylaý jáne aldyn alý agenttiginiń monıtorıng derekterine sáıkes, aýrý juqtyrǵandardyń eń kóbi Tszıanmen qalasynda tirkelgen – 2480 oqıǵa. Eldi mekende densaýlyq saqtaý salasynda tótenshe jaǵdaılarǵa jedel áreket etýdiń úshinshi deńgeıi engizildi.

Aýrýdy juqtyrý jaǵdaılary sondaı-aq aımaqtyń Foshan (157), Gýanchjoý (138), Chjaotsın (101), Shenchjen (81) jáne basqa qalalarynda da tirkelgen. Atap ótilgendeı, aýrýdyń aýyr formalary nemese ólim jaǵdaılary tirkelgen joq.

Osy aptanyń basynan beri ınfektsııanyń taralýy týraly tolyq aqparat alý jáne juqtyrý oshaqtaryn joıý úshin vırýstyń asımptomatıkalyq tasymaldaýshylary statıstıkalyq esepterge qosyldy. Qazirgi kezde aýrýǵa shaldyqqan adamdar sanynyń ósimi ishinara turaqtandy, biraq jaǵdaı shıelenisken kúıinde qalyp otyr.

Juqpaly aýrýlardyń aldyn alý ınstıtýtynyń dırektory jáne Gýandýn provıntsııasynyń aýrýlardy baqylaý jáne aldyn alý ortalyǵynyń ınfektsııalyq baqylaý jónindegi bas sarapshysy Kan Mınniń aıtýynsha, ınfektsııanyń taralý qaýpiniń joǵary bolýy QHR Qurylǵan kún jáne Kúzdiń ortasy merekesinde adamdardyń kóp júrýine baılanysty bolyp otyr.

- Saparǵa shyqqanda aýrý juqtyrý qaýpi joǵary aımaqtardan aýlaq júrińiz, qorǵanys kıimin kıińiz jáne masalardan qorǵaıtyn quraldardy qoldanyńyz. Dene qyzýy kóterilse nemese bórtpe paıda bolsa, dereý dárigerge qaralyńyz, - dep eske saldy sarapshy.

Eske sala ketsek, chıkýngýnıa qyzbasy — Aedes masalary arqyly taralatyn ótkir vırýstyq aýrý. Onyń belgilerine joǵary qyzý, teri bórtpesi jáne býyndardaǵy qatty aýrý jatady. Klınıkalyq kórinisi jaǵynan denge qyzbasyna uqsas.

Buǵan deıin Qytaı chıkýngýnıa vırýsyn juqtyrý qaýpi eń joǵary aımaqtar tizimin keńeıtkenin jazǵan bolatynbyz.