Qytaıdyń Narat jaılaýyndaǵy pishenshiler shópti drondarmen tasyp júr

ASTANA. KAZINFORM - Qytaıdyń Іle Qazaq avtonomııalyq oblysynyń Narat jaılaýynda kúz basyndaǵy shóp shabý naýqanynda pishenshiler býma-býma pishendi qorajaıǵa drondarmen tasymaldap júr, dep jazady qytaılyq Halyq gazeti.

Osylaısha, dástúrli maýsymdyq sharýany qazir zamanaýı tehnıkalar atqaratyn bolǵan.

Shabyndyqta shalǵy tartyp, shópti atpen súırep júrgen malshylardy kórmeısiń. 

Beidou joǵary dáldiktegi pozıtsııalaý júıesimen jabdyqtalǵan bul drondar óz marshrýttaryn avtomatty túrde josparlaı alady. Qýatyna qaraı bir ýaqytta 50 kg, 70 kg jáne 100 kg shóp býmalaryn erkin kóterip tasıdy.

Malshylar shabylǵan shópti býmalarǵa shaqtap daıyndaıdy. Al qalǵan isti drondar atqarady.

Drondar radar arqyly jer jaǵdaıyn anyqtap, kedergilerdi eńserip, shóp býmalaryn aldyn ala belgilengen marshrýt boıynsha tası beredi. Malshylar qolynda smart termınaly bar ekrandy túrtse jetkilikti, qashyqtaǵy ushatyn jabdyq avtomatty túrde iske qosylady.

Eske sala keteıik, buǵan deıin qazaqstandyq fılm Qytaıdaǵy baıqaýda «Úzdik operatorlyq jumys nomınatsııasyn» jeńip alǵany týraly jazǵan bolatynbyz.